Çfarë thotë ministri Adnan Jashari për rastin e Shukri Aliut
Ministri i drejtësisë Adnan Jashari sqaron për Portalb, mënyrën se i është proceduar dhe masat që ka ndërmarrë kjo ministri pas parashtresës së bërë nga ish – komandanti i UCK-së, Shukri Aliu i cili po vuan dënimin në burgun e Prilepit.
Ministria e drejtësisë konfirmon se i burgosuri Shukri Aliu ka vazhduar me parashtresën e tij deri te ministri Adnan Jashari më datë 06.07.2014 për shkelje të të drejtave nga ana e të burgosurve në burgun e Prilepit.
Nga Ministria e Drejtësisë thonë për Portalb se parashtresat e të burgosurit Shukri Alija janë marrë parasysh me vëmendje të Veçantë nga shërbimet e ministrisë, por edhe nga vetë ministrat.
“Parashtresa e dërguar nga i burgosuri Shukri Aliu vitin e kaluar deri te ish ministri i drejtësisë, Blerim Bexheti është proceduar në mënyrë që është dërguar direkt tek kryetari i Gjykatës Themelore Shkupi 1 nga ku është marrë përgjigje për rastin në fjalë. Nga Gjykata janë përgjigjur me shkresë me të cilën është njoftuar edhe vetë pala”, thotë për Portalb ministri i drejtësisë Adnan Jashari.
Ministri Adnan Jashari thotë se në kuadër të kompetencave të ministrisë parashtresa e tij është procesuar deri te drejtoresha për ekzekutimin e sanksioneve ku është kërkuar që të ndërmerren të gjitha masat për hetimin e rastit dhe të njoftohet ministri personalisht për veprimet e ndërmarra.
“Nga drejtoria në fjalë më 14. 08.2014 jemi njoftuar lidhur me gjendjen e krijuar në burgun e Prilepit, ku po vuan dënimin Shukri Alija me ç ‘rast janë ndërmarrë të gjitha hapat për zbardhjen e rastit ku janë sanksionuar personat që kanë marrë pjesë incidentin e krijuar Brenda burgut. Në këtë mënyrë, Ministria e Drejtësisë ka ndërmarrë të gjitha masat dhe iniciativat Brenda kompetencave ligjore të saj”, thotë ministri Adnan Jashari?