Punësimi i vullnetarëve heshtë BDI-në!

BDI-ja hesht rreth anashkalimit të shqiptarëve në fazën e parë të ndarjes së vendimeve për punësim të rregullt të vullnetarëve. Të kontaktuar nga Alsat, drejtuesit e institucioneve ishin të pakapshëm për të ofruar të dhëna rreth personave që kanë marrë vendime në kuadër të ligjit që u miratua në shkurt. Sekretari i përgjithshëm i BDI-së Abdylaqim Ademi theksoi se të dhëna rreth personave që kanë marrë vendime deri tani, nuk mund të sigurojnë para ditës së martë. Megjithatë, ata garantuan se sidoqoftë, numri i përgjithshëm i shqiptarëve që do të punësohen në kuadër të të tre fazave, deri shtatorin e ardhshëm do të jetë 800.

“Këto të dhëna nuk mund t’i sigurojmë para ditës së martë, por për momentin, kur u miratua ligji, të dhënat ishin që rreth 800 shqiptarë do të marrin vendim”, tha Abdilaqim Ademi për punësimet.

Të njëjtën shifër theksoi edhe një ditë më parë, zv/ministri i Financave Adrian Xheladini, i cili gjithsesi nuk ofroi të dhëna të sakta për punësimet e muajit shkurt, të faktuara me dokument.

“Diku rreth 800 shqiptarë do të marrin vendime në bazë të analizave që ka bërë Ministria e Financave në bashkëpunim me të gjitha institucionet”, deklaroi Adrian Xheladini, zv/ministër i financave.

Alsat mëson se vetëm këtë javë 200 persona kanë marr vendime për marrëdhënie të rregullt pune nëpër institucione të ndryshme ndërkaq asnjëri prej tyre nuk është shqiptarë.