Esma Rexhepova dekorohet me titullin Artiste kombëtare e Republikës së Maqedonisë

Diva e muzikës rome Esma Rexhepova-Teodosievska e mori titullin “Artiste kombëtare e Republikës së Maqedonisë”, të cilin ia ndau presidenti, Gjorge Ivanov.

Kjo është mirënjohja më e lartë në kulturë e cila i ndahet personaliteteve që kanë kontribuuar në afirmimin e Republikës së Maqedonisë në botë.

Presidenti Ivanov, i cili para tre viteve e dekoroi Esmën me “Dekoratën për merita të Maqedonisë”, në dorëzimin solemn të titullit tha se mirënjohja është falënderim për misionin e saj prej një artisteje të madhe dhe ambasadore kulturore e shtetit.

Esma Rexhepova-Teodosievska e kënaqur nga vendimi që asaj t’i ndahet mirënjohja e lartë iu falënderua shtëpisë së saj menaxheriale që e ka propozuar për çmimin, ndërsa Qeverisë dhe ministres së Kulturës Kançeska-Milevska për atë që e bëjnë që të vlerësohet puna e artistëve dhe ata të jenë të gëzuar. Theksoi se mirënjohjet duhet të vijnë gjatë jetës dhe ato ua dëshiroi kolegëve dhe miqve që morën pjesë në solemnitet.