OEMVP: Maqedonia të shfuqizojë bllokadën e grurit dhe miellit nga Kosova
Oda Ekonomike e Maqedonisë Veri-Perëndimore, ka reaguar lidhur me masat e ndërmarra nga Qeveria e Maqedonisë për taksat hyrëse për qytetarët kosovarë. Sipas tyre Maqedonia nuk ka hequr bllokadën e miellit dhe grurit për Kosovën, prandaj kanë pasuar masat e ndalimit te importit për mallrat nga Maqedonia.
“Oda Ekonomike e Maqedonisë Veri-Perëndimore, me vëmendje po ndjek situatën e krijuar lidhur me politikat ekonomike nga ana e qeverisë së Maqedonisë e cila në kontinuitet po provokon reagime komplementare të vendeve fqinje, përfshirë këtu edhe vendimin e fundit të Ministrisë së Tregtisë dhe Industrisë të Republikës së Kosovës”, thuhet në reagimin e Odës ekonomike.
Oda Ekonomike e Maqedonisë Veri-Perëndimore ka reagimet e para lidhur me vendimin e qeverisë së Republikës së Kosovës për masa reciprociteti. Në vendimin e Ministrisë së Tregtisë dhe Industrisë së Republikës së Kosovës ndër të tjera thuhet:
“Ministria e Tregtisë dhe Industrisë me qëllim të marrjes së masave adekuate ndaj bllokadës së grurit nga Qeveria e Maqedonisë, kërkon që të bllokohen disa produkte të importit të Maqedonisë.
Është viti i tretë me radhë që Qeveria e Maqedonisë bllokon miellin dhe grurin e Kosovës, e cila është në kundërshtim me marrëveshjen e CEFTAS. Përkundër premtimeve që një vendim i tillë do të shfuqizohet me datë 2 Shtator, vendimi për grurë mbeti ende i plotfuqishëm. Qeveria e Kosovës nuk mund të lejojë një bllokadë të tillë dhe si masë adekuate ndaj vendimit të tyre kërkon nga Dogana e Kosovës të bllokoj mallrat nga Maqedonia.
Duke i nisur nga ky vendim i ministrisë përkatëse të Republikës së Kosovës, Oda Ekonomike e Maqedonisë veri-perendimore, shprehim shqetësimin tonë si OEMVP, se janë pikërisht prodhuesit vendor dhe ekonomia e vendit ajo që më së shumti do goditet nga masat e stërzgjatura në emër të mbrojtjes së prodhimit vendor. Me këto masa reciprociteti, do i shkaktohet goditje e rëndë prodhimeve vendore, të destinuara për eksport. Duke ditur që kohët e fundit, Maqedonia në masë të konsiderueshme zotëron tregun e Kosovës me prodhimet e veta, kërkojmë që në mënyrë sa më urgjente të respektohet vendimi i marrë nga Qeveria e Maqedonisë për shfuqizim të vendimit për mbrojtje të grurit dhe miellit.
