fbpx

Jakup Krasniqi: Protesta si rregullator i demokracisë

Ish-deputeti Jakup Krasniqi ka ardhur në përfundim se protesta është si rregullator i demokracisë
Ai mori pjesë të shtunën në protestat e vetëvendosjes.

Lexojeni të plotë shkrimin e tij:

“Në vendet e tranzicionit, apo te demokracive të brishta, ku mentaliteti i së shkuarës zë të rikthehet për të dëmtuar demokracinë e re, duke dëmtuar sundimin e rendit e të ligjit, zhvillimin ekonomik përmes krimit e korrupsionit dhe kur përfaqësuesit e zgjedhur nuk janë në detyrën e tyre siç është në rastin tonë. Në këto raste, protesta është rregullator në shërbim te rivendosjes së demokracisë, mbase edhe te përgjegjësisë. Demokracia nuk është vetëm procedurë, si shumëkush dëshiron ti referohen. Demokracia është drejtësi, është barazi, është mirëqenie, është sundim i ligjeve te standardeve demokratike, është zhvillim ekonomik, është humanizëm e solidaritet ndër njerëzor. Demokracia është vullnet i shumicës qytetare për te qeverisur me rregulla të përcaktuara në mënyre të qartë, por nuk është diktaturë e individit që na e paska marrë “besimin” e një shumice?!.

Në Kosovë, a mund të jetë protesta rregullator i demokracisë se brishtë?

Nuk ka as edhe një dyshim se demokracia në Kosovë është para një kolapsi. Pothuajse asnjë pushtet nuk është duke funksionuar si duhet dhe në përputhje me ligjet në fuqi. Gjatë këtyre viteve të pavarësisë jo vetëm që nuk kemi pasur ngritje të kapaciteteve administrative, funksionalitet e azhuritet të ngritur, por kemi pasur rënie të dukshme deri në degradim. Degradimi i institucioneve të shtetit ka nisur apo e ka marrë të tatëpjetën e tij, pas zgjedhjeve nacionale të vitit 2010, kur në krye të shtetit erdhën njerëz që nuk kishin asnjë përgatitje politike, intelektuale e kombëtare, nuk bartnin me vete asnjë përvojë të menaxhimit institucional. Ky degradim institucional do të thellohet gjatë viteve 2011/ 2012/ 2013 e 2014 dhe do të duhej të ndodhte e kundërta. Te krijohej perspektiva e qytetarëve tanë.

Kulmi i këtij degradimit, pa dyshim që ishin bisedimet serbo- shqiptare me ndërmjetësimin e BE-së në Bruksel. Në ato bisedime pala shqiptare kishte shkuar e pa përgatitur dhe si pasoj e kësaj ajo atje kishte bërë disa marrëveshje të dëmshme, të cilat, as sot e kësaj dite nuk i dimë. Edhe pse nuk dihej se çfarë marrëveshje ishin arritur, ato u votuan nga deputetët e partive që tani janë në koalicionin (PDK –LDK). Shenjat e para serioze të atyre marrëveshjeve, kanë zënë të dalin në shesh në fund të vitit 2014 e në fillim të vitit 2015, kur filloj një ikje e madhe e qytetarëve nga Kosova. Në vitin 2015 një stimulim pakënaqësisë qytetare i dhanë dy ngjarje tjera, e para, ndodhi kur ministri i Listës serbe i fyen shqiptarët (jo vetëm nënat gjakovare) duke i quajtur “egërsira” dhe se dyti, kur qeveria brenda ditës e ndërroi qëndrimin e saj për Trepçën, duke e bërë një hap prapa. Ky kthim prapa pa dyshim që u bë me ndërhyrje nga jashtë, në ketë rast Beogradi ishte më i zëshmi.

Nuk qe problemi vetëm pse qeveria brenda pak dite e ndërroi mendimin e saj. Esenca e problemit qëndron në Kuvendin e Kosovës, i cili pa asnjë fije serioziteti e përgjegjësie, iu nënshtrua diktatit të qeverisë, duke e degraduar edhe debatin deri në atë shkallë sikur asgjë nuk po ndodhte me tërheqjen e rrufeshme te një ligji sjellë nga qeveria. Ne një situatë të tillë, kur përfaqësuesit e popullit nuk janë në përgjegjësin e tyre, për mbrojtjen e interesit kombëtar, protesta popullore mbetet mundësia e vetme e veprimit. Ketë penallti te pozitës, nuk guxonte që mos ta shfrytëzonte opozita numerikisht e vogël në Kuvend.

Sigurisht që këto që u thanë nuk ishin arsyet e vetme e as kryesoret që duhej protestuar. Kur qeveritarët bëhen arrogant për mendimin e kundërt dhe me përfaqësuesit e zgjedhur te qytetarëve, qytetarët duhet te protestojnë kundër çdo forme të arrogancës, e sidomos, kur atë e shfaqin njerëzit e veshur me pushtet. Kush me vëmendje ka përcjellë seancën e fundit të Kuvendit, nuk e ka pasur të vështirë ta vërej humbjen e arsyes nga ana e Kryeministrit, i cili me një arrogancë goxha “komuniste” ju përgjigj deputetes së Kuvendit. Kur qeveritarët shfaqin arrogancën ne demokraci, ajo është reflektim i një sjellje totalitare te përdorur nga i njëjti ne një kohë tjetër. “Çka piqet nuk hiqet”, thotë një fjalë.

Protesta ishte e nevojshme edhe për t’i treguar arrogancës së numrave në Kuvend, se aty mund t’i kesh dy të tretat, por dy të tretat në Protestë janë më shumë dhe lehtë mund ta përmbysin shumicën në Kuvend. Protestat gjithnjë duhet të jenë paqësore, pasi i gjithë tehu i tyre ishte i drejtuar kundër keq përdoruesve të pronës publike e kombëtare. Kundër keqqeverisjes, jo vetëm nga megalomania e numrave te ministrave e zëvendësministrave

Arroganca dhe vandalizmi i shfaqur nga ana e një grupi të protestuesve jo vetëm që është e pa pranueshme, por veprimet e tilla çojnë ujë në mulli të huaj dhe në rastin tonë ndihmuan keqpërdoruesit e keqmenaxhuesit e parasë publike e cila do të shfaqet edhe me rastin e riparimit të dëmeve të shkaktuara nga njerëz të pa përgjegjshëm te futur në radhët e protestuesve. Si prona shtetërore dhe ajo private duhet të ruhet si drita e syrit. Ndërsa, dalja në protestë është vullnet individual i secilit njeri! Nuk ke të drejtë t’ia shkatërrosh tjetrit pronën, pse ai nuk ka dalë në protestë. Çdo veprim imponues, është veprim dhe imitim i qeveritarëve në pushtet. Kjo formë e protestimit arrogant, si duhet as qytetarëve e as partive opozitare.

Është në përgjegjësinë e organizatorit, që asnjëherë më, mos të lejoj veprime të tilla dëmtuese për pronën private a publike si dhe, as të dëmtoi qëllimin e porosinë e Protestës! Në vend që në lajmet e mbrëmjes të flitej për mesazhet e protestës, për pjesëmarrjen masive te qytetarëve, u fol për vandalizmin e një grupi të vogël pjesëmarrësish. A ishte ky qëllimi i organizatorit? Jam i bindur që ky, në asnjë formë nuk ishte qëllimi?! Kujt i konvenoj që lajm i ditës të ishte vandalizmi e jo porositë e protestës?! Vet Protesta, me pjesëmarrjen e qytetarëve fliste më shumë se folësit e saj!”

Tags

Lajme të ngjashme

Back to top button
Close