Ivanov: Dialog me shkëmbim të ideve për transformim të suksesshëm të arsimit sipëror

Presidenti Gjorge Ivanov e përsëriti qëndrimin e tij se dialogu, shkëmbimi i ideve dhe nismat janë mënyra e vetme që mund të sjellin deri në transformim të suksesshëm të arsimit sipëror, kumtoi kabineti i tij pas takimit të sotëm të shefit të shtetit me profesorë të Nismës civile për mbështetje të diturisë në arsimin e lartë.

“Në takim presidenti Ivanov dhe përfaqësues të nismës shkëmbyen opinione për gjendjet e përgjithshme në arsimin e lartë në Republikën e Maqedonisë dhe u dakorduan për domosdoshmërinë nga zbatimi i reformave, si dhe për nevojën e arsimit sipëror cilësor. Presidenti Ivanov edhe një herë shprehu shqetësim për tendencën e ndarjes në bashkësinë akademike dhe shprehu keqardhje që u refuzua nisma për mbajtje të takimit të përbashkët sot të përfaqësuesve të Plenumit pedagogjik, të Plenumit studentor dhe të “Nismës civile për mbështetje të diturisë në arsimin e lartë”, kumtoi kabineti i Ivanovit.

Pritja tek presidenti i Maqedonisë ishte me kërkesë së profesorëve nga “Nisma civile për mbështetje të diturisë në arsimin sipëror” që t’ia elaborojnë pikëvështrimet në lidhje me ndryshimet e propozuara ligjore në fushën e arsimit të lartë dhe nevojën e ngritjes së kualitetit të arsimit të lartë.

Ata konsiderojnë se reformat janë në interes të studentëve, pedagogëve dhe në interes të zhvillimit të Republikës së Maqedonisë.