Ivanov dhe Plenumi, asnjë marrëveshje për provimin shtetëror

Kryetari i shtetit Gjorgje Ivanov i ka ftuar profesorët me të cilët është takuar sot që të veprojnë si “burrështetas” dhe jo thjesht si profesorë.

Kreu i shtetit është takuar sot me përfaqësuesit e Plenumit të Profesorëve dhe me studentët, të cilët është munduar t’i bindë se reformat në sistemin arsimor nuk prekin autonominë e universiteteve dhe interesat e studentëve.

“Qëllimi është që të përmirësohet cilësia në këto univeristete, që akutalisht nuk është e kënaqshme”, ka thënë Ivanov, i cili nuk ka bërë të qartë nëse do t’i vë veton ose jo ligjeve nëse miratohen në Kuvend.

Kjo kërkesë i është bërë atij zyrtarisht nga profesorët dhe studentët që kundërshtojnë reformat.

Në anët tjetër, profesorët që kanë marrë pjesë në këtë takim kanë konfirmuar vendoshmërinë për të kërkuar plotësimin e kërkesave të tyre.

“Ne i thamë kryetarit  se reformat nuk janë në rregull, sepse nuk është mirë  që në vend që të vazhdohet këmba e shkurtë, të shkurtohet këmba e gjatë”, ka thënë profesor Abdylmenaf Bexheti.

Ndërsa, profesoresha Gordana Siljanovska ka përmendur rëndësinë që kryetari të përdor veton dhe të manifestojë një akt të kontrollimit të veprimit të organeve ekzekutive.