Janë gjetur “pjesë të mëdha” të aeroplanit AirAsia
Ekipet e kërkim-shpëtimit thonë se i kanë gjetur dy “pjesë të mëdha” të aeroplanit të kompanisë AirAsia, që është përplasur në det afër Indonezisë, më 28 dhjetor, me 162 njerëz në të.
Shefi i agjencisë së Indonezisë për kërkim-shpëtim, Bambang Soelistyo, tha sot se “mund të siguroj se këto janë pjesë të aeroplanit AirAsia, të cilat ne i kërkonim” dhe ka shtuar se është gjetur edhe saasi e madhe e karburantit të rrjedhur nga aeroplani.
Ai ka theksuar se dy pjesë të aeroplanit janë 30 metra nën ujë.
Aeroplani i udhëtarëve është rrëzuar në Detin Xhava, derisa fluturonte nga qyteti indonezian, Surabaja, për në Singapor.
Tashmë janë nxjerrë 30 trupa të pajetë.
Ekipet e specializuara ende janë në kërkim të kutive të zeza të aeroplanit të përplasur.
Në përgjithësi, operacionet e kërkim-shpëtimit ishin tejet të vështirësuara për shkak të motit me reshje të mëdha të shiut edhe erëra të forta.
Shkaqet e përplasjes ende janë të paqarta.