Edhe dy ditë afat për dorëzimin e kërkesës për blerjen e oborreve të shtëpive

Deri të dielën do të jetë afati për dorëzimin e kërkesave nga qytetarët për blerjen e hapësirave apo oborreve pranë shtëpive të tyre, edhe ate 1 euro për një metër katror.

Një numër i madh i qytetarëve kanë shfrytëzuar këtë të drejtë, duke bërë aplikimin pranë njësive rajonale të Drejtorisë për çështje pronësore – juridike, ndërsa pjesa tjetër e qytetarëve këtë të drejtë mund ta shfrytëzojnë deri më 15 dhjetor, apo ditën e diel. Ministri i Financave, Zoran Stavrevski theksoi se drejtoria dhe njësitë rajonale me qëllim të plotësimit të kërkesave të qytetarëve, do të punojë edhe ditën e diel.

Nga fillimi i projektit deri tani kanë aplikuar mbi 250 mijë qytetarë, ku vetëm këtë vit aplikimet kanë bërë 13 mijë qytetarë. Projekti ka hyrë në fuqi nga viti 2011.