Meta: Vizita e Ramës në Serbi, vendosmëri për të normalizuar marrëdhëniet
Kreu i Kuvendit Ilir Meta ka folur sot edhe per doreheqjen e deputetes Luiza Xhuvani, pas ngjarjes se rende ku eshte i implikuar i biri i saj.
“Pas dorëheqjes së Xhuvanit do të veprohet sipas rregullave. Do të zbatohen procedurat, pavarësisht nga tragjedia. Dorëheqja vlerësohet, mesazh për gjithë deputetët e politikanët” deklaroi Meta.
Komentet kreu i Kuvendit i bëri pas takimit të XIII të grupit të punës të bashkëpunimit të Europës Juglindore. Nder te tjera Meta konfirmoi vullnetin për avancimin e punës dhe për zgjidhjen e çështjeve të mbetura pezull.
“Në kontekstin global ku jetojmë, bashkëpunimi rajonal është i rëndësishëm edhe për të kapërcuer barrierat e së kaluarës. Përmes fuqisë transformuese në Bashkimit Europian ne mund të konstribuojmë si parlamente, për përmirësimin e mirëqenies së qytetarëve. Shpreh rëndësinë e avancimit të një historie të re për rajonin tonë, jo për kufijtë, por për një të ardhme më të mirë për fëmijët tanë dhe gjeneratët pasardhëse”, u shpreh Meta
Ndërsa vizitën e kryeministrit Rama në Serbi, që pritet të zhvillohet ditën e hënë, Meta e cilësoi si vendosmëri nga ana e tij për të normalizuar marrëdhëniet me Serbinë.
“Takova nënkryetaren e Parlamentit të Serbisë, zhvillova një bisedë mjaft konstruktive dhe mirëkuptuese. Pra është një vizitë e cila zhvillohet në drejtimin e duhur, tregon vendosmëri për të ecur më tej në rrugën e normalizimit dhe transformimit. Ne kemi përgjegjësi të veçantë për të ardhmen e gjithë rajonit. Këtë përgjegjësi duhet ta ushtrojmë duke mos përsëritur frymën konfliktuale të së kaluarës, të bëjmë histori jo për histori, por histori për të ardhmen”, tha ai.