Nuk përfillen kërkesat e nxënësve të shkollës “Toli Zordumis” në Kumanovë
Këshilli i prindërve i nxënësve të shkollës fillore “Toli Zordumis”-Kumanovë edhe pas takimit me autoritete e arsimit nuk gjejnë përgjigje në mbështetje të kërkesave të tyre. Nxënësit vazhdojnë bojkotin e msimit të filluar dy javë më parë.
Këshilli i prindërve në kërkesën e tyre kërkojnë zbatimin e ligjit për arsim fillor (Neni13), respektimin e përfaqësimit adekuat në organet e shkollës, kërkojnë formimin e një paraleleje në gjuhën shqipe duke e pasur parasysh numrin e nxënësve shqiptarë i cili sillet rreth 30 nxënës, e që mësojnë në një paralele, ndërkaq nga ana tjetër 27 nxënës maqedonas janë të shpërndarë në tre paralele, shkruan gazeta Lajm.
Kërkesat, Këshilli i prindërve në mënyrë formale, sot i ka dorëzuar në Komunën e Kumanovës, te drejtoria e shkollës dhe Inspektorati për arsim- Kumanovë.
“Sot, ne si Këshill kemi dorëzuar kërkesat tona në Komunën e Kumanovës, te drejtoria e shkollës dhe Inspektorati për arsim- Kumanovë. Në Komunë hasëm në administratorë të pa përgjegjshme të cilët u sjellën në mënyrë brutale ndaj neve, për faktin se ne e kishim parashtruar kërkesën në gjuhën shqipe, ndërsa sipas tyre kjo gjuhë ishte e pa njohur për to” ka deklaruar për “Lajm” kryetari i Këshillit të prindërve, RexhailAziri.
Sipas tij, bojkoti nuk do të ndërpritet deri në plotësimin e plotë të kërkesave të tyre.
“Në rast se vazhdojnë institucionet të mos i përfillin kërkesat tona, ne ditët në vijim do të radikalizojmë mekanizmat tonë, kuptohet në mënyrë demokratike do të kërkojmë atë që na garantohet edhe me ligj”, ka përfunduar Aziri.