Analiza e ADN-së do të përcaktojë nëse trupi i gjetur në Detin Egje është i Denisa Markoskës

Një trup femëror në fazë progresive të dekompozimit të shtunën është gjetur në bregun veriperëndimor të ishullit grek Karpatos, për të cilin ekzistojnë dyshimet se bëhet fjalë për qytetaren e zhdukur të Maqedonisë, Denisa Markoska.

Trupi është dërguar në ishullin Rodos ku do të bëhet autopsia me qëllim që të përcaktohet koha e vdekjes ose informacione të tjera të cilat mund të çojnë drejt zbulimit të identitetit dhe shkakut për vdekjen e kësaj femreje.

“Etnos” shkruan se sipas indikacioneve të para, mund të bëhet fjalë për 23-vjeçaren Denisa Markoska e cila më 12 shtator u zhduk nga anija “Serenisima” në të cilën ka punuar. Anija atë ditë ka lundruar midis Karpatosit dhe Rodosit, ndërsa destinacioni përfundimtar i saj ka qenë Agios Nikolaos.

“Hetimi i cili bëhej për zhdukjen e Markoskës nuk dha kurrfarë rezultatesh por tani autoritetet janë duke i lidhur dy rastet, shkruan “Etnos” dhe shton se për gjithçka janë njoftuar ambasada e Maqedonisë në Athinë dhe autoritetet e Maqedonisë.

Burime të MIA-s në Ministrinë e Punëve të Jashtme të Maqedonisë konfirmuan se policia greke ka kërkuar përmes Ambasadës së Maqedonisë në Athinë organet kompetente të kyçen në identifikimin e trupit, gjegjësisht në analizat e ADN-së.