Erdogan nuk zbulon detaje për lirimin e pengjeve
Presidenti i Turqisë, Recep Tayyip Erdogan, ka thënë se qeveria e tij nuk do të zbulojë detajet e një operacioni të fshehtë për lirimin e 49 personave, që mbaheshin peng nga militantët e Shtetit Islamik.
Pengjet – 46 turq dhe tre irakianë – janë kthyer në Turqi më 20 shtator.
Grupi është mbajtur për më shumë se tre muaj nga Shteti Islamik, i cili e ka rrëmbyer atë pasi ka pushtuar qytetin irakian të Mosulit, në muajin qershor.
Ajo se çfarë ka bërë Turqia për të siguruar lirimin e pengjeve, ka qenë subjekt i shumë spekulimeve.
Erdogan ka mohuar se ka paguar para për lirimin e tyre.
Ai po ashtu nuk ka pranuar se ka pasur shkëmbim të të burgosurve me grupin terrorist.
