Kërcovë, komisioni do t’i vlerësojë dëmet nga permbytjet

Stuhia e madhe dhe reshjet e së mërkurës kanë shkaktuar dëme të mëdha materiale në disa fshatra të Kërçovës me ç‘rast Komuna e Kërçovës ka marrë iniciativë për formimin e një Komisioni për vlerësimin e dëmit material në këto vende. Bëhet fjalë për fshatrat Sërbicë, Tuhin dhe Kaleshe ku është dëmtuar shtrati i një lumi, janë dëmtuar disa shtëpi dhe është djegur një traktor si pasojë e rrufesë që ka goditur një kasolle.

“Kryetari i Komunës së Kërçovës z. Fatmir Dehari, për vlerësimin e dëmeve të shkaktuara ka formuar Komision për vlerësimin e demit material. Komisioni përbëhet nga 5 anëtarë, detyra e së cilëve është të evidentojnë dëmet e shkaktuara dhe të përpilojnë procesverbal duke e shqyrtuar situatën e krijuar në terren.” – thonë nga Komuna e Kërçovës.

Shiu i ditëve të fundit ka shkaktuar përmbytje edhe në qytet dhe disa fshatra të tjerë në Kërçovë por fatmirësisht nuk janë regjistruar dëme të mëdha materiale.