Strugë, shtohet besimi tek institucionet komunale, por edhe kërkesat
Qytetarët në Komunën e Strugës, janë bërë më kërkues kur bëhet fjalë, për lirimin e hapësirave publike, ruajtjen pastër të mjedisit, pengimin e ndërtimeve pa leje dhe kontestimin e atyre që janë ndërtuar më herët.
Edhe subjektet ekonomike private që zhvillojnë aktivitetin e tyre në mënyrë të ligjshme, duke paguar taksat dhe detyrimet tjera ndaj shtetit, janë gjithnjë e më kërkues në mbrojtjen e të drejtave të tyre. Ata gjithmonë e më shumë po i denoncojnë rastet e keqpërdorimeve, të kësaj natyre duke luftuar konkurrencën jolojale që u bëhet.
Kjo është përshtypja që ndan me Portalb, Agni Dauti inspektor Komunal, i cili sot në mëngjes kishte dalë në punë në qytetin e Strugës, për të konstatuar pretendimet e qytetarëve për shkelje të natyrave që përmendëm më lartë.
“Qytetarëve u është shtuar besimi se ata mund t’i realizojnë të drejtat e tyre të munguara për çështje që kanë të bëjnë me pastërtinë në qytet, lirimin e hapësirave publike, ndërtimet pa leje, konkurrencën jolojale etj?”, thekson Agni Dauti, i cili konstaton se krahas kësaj , si pasojë e shtimit të besimit në institucionet komunale, janë shtuar edhe kërkesat e qytetarëve në raport me zbatimin e ligjit.
Ai madje, thotë se besimi në institucionet komunale është rritur tek të gjithë qytetarët pa marrë parasysh përkatësinë e tyre etnike. Kështu sipas tij, ata jo rrallë shprehen se po e ndjejnë se disa nga problemet e tyre kanë filluar edhe të zgjidhen. Në këtë kontekst, Dauti përmend pastërtinë më të madhe në qytet, rregullimin e rrugëve, mbrojtjen e tregtarëve nga konkurrenca jolojale etj.