Dënimi i gjashtë protestuesve e ka një logjikë dhe disa qëllime!
Nëse don të harrohet një problem, krijo një tjetër, të ri!
Dihet se në Maqedoni gjykatat janë plotësisht të varura dhe marrin urdhëra nga Qeveria. Kjo u pa më së miri me shtyerjen e dhënjes së vendimit për rastin e ashtuquajtur ’Monstra’, kur gjykatësi ‘u sëmurë’ me urdhër të qeverisë, derisa u formua qeveria e re dhe pasi ajo u formua, gjykatësi ‘u shërua’ dhe e shpalli verdiktin që dihej paraprakisht se cili do të jetë.
Dënimet e para pak ditëve të gjashtë protestuesve përbëjnë dënime drakonike, shumë më të rënda se sa serioziteti i veprimeve që ju mvisheshin të akuzuarve, qoftë edhe nëse vërtetohej fajësia e tyre. Nuk do ndonjë mundim të madh që ta kuptosh së qëllimi i këtyre dënimeve është frikësimi i njerëzve që ata të mos dalin më në protesta. Kështu VMRO-ja do ja lehtësojë punën BDI-së që ajo të vazhdojë të luajë rolin e kukullës, rol ky që luanin dikur ish-komunistët shqiptarë në pushtetin e Maqedonisë, pa pasur frikë nga masivizimi i protestave.
Por unë nuk besoj se protestuesit e dënuar, do t’i mbajnë 3 vitet e burgut me të cilat janë dënuar. Pasi kjo çështje të sorollatet gjykatave, ka mundësi që gjykata e apelit t’i ul dënimet … ose t’i kthejë ato në dënime me kusht … ose t’i lirojë të dënuarit … ose ta kthejë lëndën për rigjykim në shkallë të parë, duke e kthyer çështjen në fillimi. Mesazhi i frikësimit të të tjerëve përmes dënimi të gjashtë protestuesve tashmë është përcjellë.
Përveç rolit të frikësimit të opinionit, dënimi i protestuesve ka edhe një qëllim tjetër, më kryesor – devijimin e vëmendjes nga dënimet e shqiptuara për rastin ‘Monstra’, duke u marrë me problemin e ri të krijuar me dënimin e protestuesve.
Kësaj rradhe BDI-ja nuk do ta nxjerrë papagallin e vet që në cilësinë e zëdhënësit që të mashtrojë shqiptarët sërish, duke aktruar para kamerave. Çështjen tashmë e kanë në dorë gjykatat dhe ato do e luajnë rolin bashkë me BDI-në, më mirë se ndonjë zëdhënës i dalë boje për gënjeshtrat që ka thënë pa fund.
Pengmarrja është një aksion jo vetëm për të kërkuar para, por shpesh edhe për shkëmbimin e pengjeve. Dënimi i të gjashtëve sikur ngjan me një lloj pengmarrje për shkëmbim të dënimeve.
Të gjashtë protestuesit e dënuar ‘janë marrë peng’ nga pushteti dhe lirimi apo zbutja e dënimeve të tyre duhet të shkëmbehet me kthimin e lavdisë së BDI-së, si subjekti që i zgjidh problemet e të burgosurve … si ky i protestuesve të dënuar … por edhe si subjekti që nuk mund t’i zgjidh të gjitha problemet e të burgosurve … si ai të dënuarve për rastin ‘Monstra’ … sepse njerëz jemi dhe të gjithë e dijmë se të gjitha problemet nuk mund t’i zgjidh askush … apo jo?!
Dënime më të ulta … dënime me kusht për gjashtë të dënuarit në protesta … kthim i çështjes për rigjykim … apo ndoshta eventualisht edhe lirim i gjashtë protestuesve … këto do të propagandoheshin me të madhe nga BDI-ja dhe mediat e tyre servile si fitore e madhe e politikave patriotike të BDI-së … E sa për rastin ‘Monstra’!? … ehhhh … e thamë: askush, e as BDI-ja, nuk mund t’i zgjidh krejt, të gjitha problemet …!
