Berisha: Lehtësi biznesit të vogël

Kryeministri Sali Berisha është takuar paraditen e së hënës me përfaqësues të biznesit të vogël, të cilëve u ka premtuar se do t’u marrë parasysh sugjerimet, si dhe një sërë lehtësish në 4 vitet e ardhshme. 

Gjatë fjalës së tij Berisha ka thënë se, punësimi është dhe mbetet objektivi më madhor dhe qëllimi më final i çdo reforme që ndërmerr qeveria, e cila për rrjedhojë do të favorizojë biznesin. 

“Të favorizojmë sa më shumë biznesin, sepse tek ai bazohet punësimi. Gjatë këtyre viteve ne kemi punësuar nënpunës publikë në infrastrukturë, në ndërtimin e rrugëve, shkollave, mbi 300 ujësjellësash e 410 sisteme kanalizimi, qendrave shëndetësore, spitaleve dhe objekteve të tjera publike”, ka deklaruar Berisha. 

Sipas tij, Shqipëria ia ka dalë që nga kulmi i krizës, deri në vitin që është sot, bizneset të rriten me 30 për qind, me ato të mëdha 2 herë më shumë, si dhe të tërheqë investime të huaja direkte më shumë se kurrë. 

Më tej kryeministri ka premtuar lehtësimin e taksave për biznesin e vogël, si dhe për të rinjtë e punësuar, duke mos anashkaluar akuzat ndaj rivalit të tij politik. 

“Ne, që kur erdhëm në pushtet, ulëm taksat për ju. Ish-kryetari i bashkisë së Tiranës arriti që me politikën e taksave detyroi biznesin e vogël të paguajë 148 mijë lekë. Por këto janë të shkuara, rëndësi ka hartimi i një projekti që biznesit të vogël t’i krijojmë lehtësi maksimale”, ka thënë Berisha. 

“Taksa mbi biznesin e vogël është shumë më e vogël se taksa që hoqëm ne mbi të ardhurat personale. Ne do heqim çdo lloj detyrimi tatimor për çdo të ri të punësuar”, ka shtuar ai.