Seferi dëshiron titullin kampion në WBO
Kampioni aktual evropian në versionin WBO, Nuri Seferi, i cili gjithashtu është i treti në ranglistën e WBO-së, është pranë duelit të tij historik për të marrë kreun e renditjes në këtë kategori.
Seferi i cili ditë më parë qëndroi në Tiranë për të takuar kryeministrin e Shqipërisë, Sali Berishën dhe ministrin e Turizmit, Kulturës, Rinisë dhe Sporteve, Aldo Bumçin, mori premtimin nga institucionet më të larta të vendit se do të marrë mbështetjen për zhvillimin e duelit të ardhshëm në kryeqytetin shqiptar.
Seferi para tij ka dy boksierë të renditur, amerikanin BJ Flores, i cili renditet në pozitën e parë dhe ish-kampionin e botës, turkun me nënshtetësi gjermane, Firat Arslan, i cili renditet në vendin e dytë në WBO.
“E kam ëndërr të kamotshme të boksoj në Shqipëri, dhe ëndrra ime po bëhet realitet. Gjithçka është gati dhe unë ka fundi i muajit prill apo fillimi i muajit maj do të boksoj në Tiranë”.
“Dëshira ime është të boksoj me BJ Flores, po ai po i ikë përballjes me mua. WBO do të zbresë atë nga pozita e parë nëse nuk bokson me mua. Por, për mua nuk ka rëndësi, në Tiranë në fund të pranverës do të marrë kreun në WBO”, ka thënë Nuri Seferi për KosovaBoxing.