Kurora lulesh për lavdinë e UÇK-së,para për branitellat

Intervistë me kryetarin e Veteranëve të Luftës së UÇK-së në Maqedoni, Besim Hoda.

B. Hoda: Me ligjin për “branitella” nuk ka ndodhur asgjë e re veçse “ka dalë kopili në derë” , një punë që është bërë brenda 10 viteve tani ka dalë në mënyrë publike. Fatkeqësia qëndron në atë se edhe BDI-ja  edhe PDSH-ja e kanë fshehur këtë ligj para popullatës. Veprimi i Sllupçanit është medial sepse nderimi për dëshmorët nuk bëhet vetëm më kurora lulesh. Janë 27 familje që kanë gjendje skajshmërish të vështirë, dhe i kam thënë dhe Ahmetit se  është e turpshme të thotë se u kanë ndarë 30 banesa atyre, ndërsa realisht janë dhënë vetëm 6 dhe banesat tjera i morën komandantët. 

PORTALB : Çështja e “branitellave”, gjithnjë e më shumë po shtrohet si problem që ve në pikëpyetje Qeverinë. Për shoqatën tuaj, do të thotë kjo një betejë e humbur në kohë paqe?

B.HODA: Kjo në fillim është nisur si fushatë politike, por me sa duket problemi tani është zhytur më thellë duke shkaktuar një krizë qeveritare, në bazë të atyre informatave që kemi ne. Por problemet vetë i kanë shkaktuar partitë shqiptare me servilizmin e vet brenda këtyre 10 viteve që i kanë në Qeveri , posaçërisht BDI-ja, e cila për dallim nga gjitha subjektet tjera ka pasur në dispozicion një kapital të madh kombëtar, duke e marrë guximin të thirret në emër të luftës, për të cilën nuk do të kishte të drejtë. Ali Ahmeti nuk guxon të përvetësojë luftën dhe sakrificën e 2001-shit sepse në të nuk morën pjesë vetëm shqiptarët e Maqedonisë, ajo ishte luftë kombëtare. Kështu që e gjithë kjo nuk na lejon dhe nuk është e hijshme që dikush të thirret në emër të luftës. Subjektet politike vijnë e shkojnë ndërsa çështja kombëtare dhe lufta është një kauzë gjithëkombëtare. Individë apo parti e ngulfatin këtë çështje duke u thirrur në emër të UÇK-së si prezantuesit e saj dhe marrin të drejtën për të trashëguar vlerat e luftës. Kjo absolutisht nuk duhet të ndodhë, është gabim shumë i madh dhe historia do të ishte shumë më mirë të njihte Ali Ahmetin si një komandant të përgjithshëm të UÇK-së se sa një politikan që është tani në dështimin e sipër.

PORTALB : Theksuat në fillim  se çështja e ish pjesëtarëve të luftës është shtruar si fushatë, tani mendoni se është shndërruar në një krizë politike?

B.HODA:Kemi të dhëna të sakta se është fushatë dhe kemi alarmuar shume herë ne medie se nga 20 janar 2002 funksionon ligji i të ashtuquajturve “branitella” dhe ata marrin beneficione publike nga shteti. Dy herë në Parlamentin e Maqedonisë janë shpërblyer me banesa dhe beneficione tjera. Ky ligj që tani propozohet nuk ndryshon as 10 % nga ajo që ata e kanë. Në mënyrë sistematike të gjitha qeveritë e kanë ngacmuar çështjen e UÇK-së sepse është shumë e ndjeshme, për përfitime politike. Nga 2002 asnjëherë s’kemi pas një reagim të vërtetë nga partitë shqiptare për të mbrojtur shqiptarët, gjegjësisht më e rëndësishme se gjithçka,  familjet e dëshmorëve por edhe për të gjithë është zgjedhja e statusit të shqiptarëve të Maqedonisë. As dëshmorët e as ne ish pjesëtarët e UÇ?-së asnjëherë se kemi menduar se do të hymë në një luftë për të përfituar materialisht, por thjeshtë për kauzën shqiptare. Nderimi për dëshmorët nuk është nderimi me kurora lulesh, por përkujdesja për ta dhe mbi të gjitha zgjidhja e çështjes shqiptare në Maqedoni. Veprimi i Sllupçanit është medial sepse njëkohësisht vuajnë familjet e dëshmorëve dhe vepra e tyre nuk njihet, kjo është një nënçmim.
Elementi i propagandës qëndron në atë se ligji ka funksionuar dhe në fillim propaganda politike për këtë u ka shkuar në dobi të dyja palëve por më pas acarohen marrëdhëniet dhe tani Gruevski po e ndëshkon publikisht BDI për një gjë që është e kryer. Kjo është një lojë politike sepse në anën tjetër branitellat kanë shkuar përkrah opozitës dhe kjo njashtu është një ndëshkim ndaj tyre për të krijuar përçarje dhe te ato dhe për ta minimizuar vlerën e një subjekti të dalë në emër të branitellave. 
Hipotekat që kanë krijuar subjektet politike shqiptare ndaj shtetit dhe patronit të tyre Gruevski, shihen tani. Ai që para 4 viteve e tha që asnjëherë nuk do të ketë ligj për UÇK dhe asnjëherë gjuha shqipe  nuk do te jetë zyrtare dhe këtë është duke e praktikuar në terren si pasojë e vasalitetit të skajshëm të partive shqiptare në Maqedoni.

Ne themi se nuk ka ndodhur asgjë me ligjin për branitella veçse “ka dalë kopili në derë” , një punë që është bërë brenda 10 viteve tani ka dalë në mënyrë publike, fatkeqësia qëndron në atë se edhe BDI edhe PDSH e kanë fshehur këtë ligj para popullatës.  Ky ligj brenda 15 ditëve do të kalojë dhe jam i bindur se do të jetë me procedurë të përshpejtuar ku do të sanksionohen fjalimet e deputetëve. Me këtë subjektet politike do të mundohen ta amortizojnë këtë problem, por me siguri pala shqiptare do të humbë.

PORTALB : Po Ahmeti tha se mandatin tjetër do të zgjidh çështjen tuaj?
B.HODA: Si gjithë deklaratat e tjera dhe kjo është në atë stil,  në 4 mandate të BDI-së e kemi parë se nuk është realizuar kjo. Ai gjithnjë ka premtuar dhe nuk po ndodh, se di nëse ndodh kjo se ai harron premtimet apo thjeshtë vazhdon të bëjë politikë në emër të gjakut të dëshmorëve dhe kjo do të ishte shumë e dhimbshme nëse e bën. 

PORTALB : Deri më tani ju nuk arritët të imponoheni më fuqishëm për të shkaktuar dridhje politike. Çfarë faji ka BDI-ja, nëse ju deri më tani nuk arritët të tregoni forcën e vërtetë morale, përballë padrejtësive që ju bëhen ish pjesëtarëve të UÇK-së?

B.HODA:  Fatkeqësia që ne nuk arrijmë dot të imponohemi qëndron pikërisht në përçarjen e madhe që ekziston brenda partive politike. Veprimi jonë në paqe është vetëm përmes strukturave politike konkrete dhe ne sa herë që kemi diskutuar me të gjitha strukturat politike dhe na kanë thënë se e kanë prioritet por ja që nuk e kanë zgjidhur. Ne e kryem mandatin tonë në 2001-shin,  dhe duke pasur parasysh që ne nuk pranohemi as si shoqatë legjitime, i bie që serish të kapim pushkën për te zgjidhur problemin. Partitë tentojnë të manipulojnë dhe me ne.

PORTALB : Përpjekjet e shoqatës tuaj kanë qenë  në nivelin e një lufte verbale me partitë politike, kjo nuk i ka shqetësuar shumë ato. Keni kërcënime për të heshtur nga partitë politike shqiptare?

B.HODA: Kërcënimet gjithmonë na janë bërë kur ne nuk jemi pajtuar me ata,na është ofruar post politik dhe nuk kemi pranuar. Lajkatimi i tillë ndodh para zgjedhjeve duke menduar se ne duke sulmuar njërën parti do ta kthejmë elektoratin nga tjetra. Dhe sigurisht e kanë marrë përgjigjen e duhur se ne nuk e kemi këtë qëllim. Gati 7 vite ne mbijetjmë me kapacitetet tona dhe kjo tregon se ne nuk e kemi mendjen të heshtim edhe përkundër kërcënimeve herë nga partitë e herë nga shteti në mënyrë të vazhdueshme. 

PORTALB : Kur jemi te kërcënimet ju para disa ditëve alarmuat opinionin se po ju bëhen kërcënime antarëve tuaj kur kalojnë kufirin, çfarë në të vërtetë ndodh?

B.HODA: Shumë shpesh kur anëtarët tonë kalojnë pikat doganore ato i ndalojnë me orë të tëra duke thirrur edhe shërbimin shtetëror sekret nga Shkupi, duke ushtruar dhunë sistematike psikike ndaj tyre me fjalët se “janë në ndjekje të gjitha veprimeve dhe nuk do t’ia arrijnë qëllimit kundër shtetit”. 

PORTALB : Rastet i keni paraqitur në organet kompetente ?
B.HODA: Faktori ndërkombëtar është i vetmi që na ka ndihmuar ne kemi kontakte të rregullta me to, ato madje na kanë liruar anëtarët tonë kur janë arrestuar. Madje njëherë u kidnapua një anëtarë i joni dhe me intervenimin e ndërkombëtarëve dhe kërcënimeve tona mediale ai u lëshua. 

PORTALB : Keni evidentuar të dhëna reale për atë se  çfarë përfituan deri më  tani “Branitellat” e çfarë ish pjesëtarët e UÇK-së?
B.HODA: Ligjin e kam parë që nga 2007 i cili është i ngjashëm me këtë tani, në këtë ligj Branitellat trajtohen si pjesëtarë të forcave të sigurisë së shtetit. Marrin një sasi prej 150 rrogave mesatare para kesh, banesa kanë , të drejta për shkollim qoftë jashtë dhe brenda vendit. Shoqja e “branitellit” merr pension deri më 1200 euro, babai dhe nëna e të rënit maqedonas, babai dhe nëna e gruas së tij, madje ç’është më absurde dhe qesharake fakti se nëse i rëni ka pasur lidhje jashtëmartesore dhe kjo vërtetohet atëherë dhe dashnorja e tij do të marrë pension. Ndërsa UÇK fitoi vetëm lavdinë që kanë pasur mundësinë të mbrojnë popullin e tyre dhe ruajnë atë krenari me fanatizëm, ndërsa në aspektin publik ato kanë përfituar vetëm injorim dhe nënçmim nga strukturat shtetërore dhe nga ish shokët e tyre të luftës që e kanë gojën plotë me premtime.

PORTALB : Po mirë ka disa të dhëna se janë punësuar disa pjesëtarë të UÇK-së dhe janë ndihmuar..
B.HODA: Nënçmuese është kjo që ndodh, një punësim individual por joadekuat në USHT që shumë shpesh lejon që të përgojohen pikërisht ushtarët e UÇK-së posaçërisht ato që nuk kanë pasur një bagazh adekuat akademik për ta bërë atë punë në Universitet. Kjo nuk është zgjidhje e statusit por nënçmim. Kjo zgjidhje parciale nuk përkon me realitetin. Ne kemi bërë një inspektim në çdo familje dhe kemi parë se janë dhënë shuma para vullnetarisht nga dashamirët dhe jo në mënyrë të barabartë. Disa kanë marrë nga 50 euro e disa nga 5 mijë dhe fatkeqësisht dhe këtu është bërë ndarje nga ata që e mbështesin BDI dhe ato që nuk e mbështesin. Janë 27 familje që kanë gjendje skajshmërisht të vështirë, dhe i kam thënë dhe Ahmetit se  është e turpshme të thotë se u kanë dhënë 30 banesa atyre ndërsa realisht janë dhënë vetëm 6 dhe banesat tjera i morën komandantët. 

PORTALB :Me sa duket edhe shoqatat e ish ushtarëve të luftës janë të përçarë, ju, Fazli Velu , Kalaja, çfarë ndodh kështu dhe me ju?

B.HODA: Parimi jonë ka qenë që të ndahemi nga partia politike dhe prandaj u shkëputëm nga BDI. Ne vetëm si strukturë partiake mund të fitojmë dhe të bëjmë presion te partitë politike ti arrijmë të drejtat.
 
PORTALB :Është bërë një metaforë e zakonshme ku thuhet se “ Komandantët e kanë fjalën”, parë nga prizmi i jetës politike deri diku mund  të jetë e vërtetë, sa kjo ve nën hije ish pjesëtarët e UÇK-së që u sakrifikuan me të vërtetë?

B.HODA: Personalisht asnjëherë nuk e kam quajtur privilegj të quhem komandant, madje e ndjej si nënçmim kush më thërret ashtu. Për vete jam farmacist që e la familjen për ti shërbyer kombit dhe pas lufte u ktheva në të njëjtin profesion. Ato që e përdorin këtë metaforë e shohin Ali Ahmetin dhe gjakun e dëshmorëve si mundësi përfitimi materialisht. Dhe kjo duhet të jetë shumë nënçmuese edhe për Ahmeti.

PORTALB: Përfaqësuesi i “Branitellave” Stojanço Angelov tha se nuk ka asgjë kundër UÇK-së por beneficionet nuk duhet ti marrin nga shteti, cili është qëndimi juaj?
B.HODA: I kam bërë me dije që më herët se shteti ose do të jetë i përbashkët ose i askujt. Ai këtë të drejtë e merr duke e parë superioritetin politik që dëshmon pala maqedonase mbi ato shqiptare, mbi të gjitha inferioritetin naiv të subjektit shqiptar duke kërkuar dhe jo duke marrë atë që na kërkon. Ne definitivisht duhet të ndalemi së kërkuari dhe të marrim atë që na takon. Nuk mjafton deklarata e Ahmetit se “Maqedonia sa e imja dhe e Gruevskit” po thjeshtë këtë duhet ta dëshmojnë në vepra duke marrë pjesën që na takon e jo të shtrijmë dorën e lypësit.

PORTALB :Një dekadë pas lufte, shqiptarët ende kanë probleme me të drejtat e tyre, kështu që disa thonë se ndoshta dhe nuk ishte nevoja për luftë, mbase dialogu do të ishte zgjidhje?

B.HODA:  Ky është deklarim i dhimbshëm dhe tendencioz, ashtu si që është ai i Ali Ahmetit se shqiptarët kanë filluar të frymëzojnë pas 2001-shit ose i kanë marrë të gjitha të drejtat. Problemi qëndron në jo- institucionalizimin e shqiptarëve dhe kjo është fatkeqësia. Nuk ka institucion konkret ku shqiptari mund të kërkojë drejtësi dhe ta gjejë atë deri në fund. Madje dhe ministri shqiptar i drejtësisë nuk ka arritur të zbardh totalisht rastin e Brodecit apo vreshtave të Reshtakut apo Radushës. Vazhdojnë të vuajnë në burgje njerëzit ndërsa ministri është shqiptar. 
Ndërsa dhe sistemi arsimor vuan, sa herë që ndërrohen partitë në pushtet ndërrohen dhe profesorët, arsimtarët madje dhe edukatorët e çerdheve. Ne jemi duke e shkatërruar palcën e një kombi. Nga 2006-ta e vazhdon dhe BDI, po ndodh një shkatërrim i arsimit shqip, në universitete dhe shkolla nuk shihet nota mesatare apo vlera akademike por thjeshtë libreza partiake. Kjo do të na kushtojë shumë më shumë se sa ligji i dëshmorëve.

PORTALB : Nëse BDI-ja, është pjesë e një loje politike, për të rifreskuar VMRO-në në retorikën e saj nacionaliste, atëherë si do të jetë organizimi i juaj në të ardhmen?

B.HODA: Nuk besoj se BDI-ja, po bën këtë lojë por thjeshtë ka hyrë në një fushë që nuk është në gjendje të dalë, dhe në vend që të kërkojë të bashkohet me popullin ajo ende mban një maskë duke shpresuar se Maqedonia nuk ka se çfarë bën dhe do të hyjë në NATO dhe BE. Pavarësisht se çfarë hallesh ka prioritet e cakton hyrjen në NATO dhe BE, por kjo mund të ndodh vetëm nëse Gruevski, thotë po, e jo BDI-ja,  sepse realisht ajo nuk ka fuqi. Këtë e dëshmon Gruevski këto 7 vite të fundit.  BDI-ja,  në vend që të punojë në terren për të realizuar popullatën shqiptare,  falë së cilës është në Qeveri ajo merret me politika globale që as ka kapacitet e as i lejohet nga Gruevski. 

Është koha që partitë shqiptare si dhe intelektualët të bashkohen rreth disa pikave të përbashkëta kombëtare dhe pavarësisht cila vjen në pushtet ta udhëheqë betejën rreth këtyre pikave kyçe për shqiptarët dhe atë me afat të caktuar. /Portalb  

Lajme të ngjashme

Back to top button