Ish-kryeministri Gruevski, komenton 6 hetimet e reja të PSP-së
Ish-kryeministri Nikolla Gruevski mbrëmë përmes një statusi në profilin e tij në Fejsbuk ka komentuar gjashtë rastet e reja për të cilat Prokuroria Speciale Publike ka nisur hetim. Sipas tij këto gjashtë hetime janë vetëm vazhdim i persekutimit politik ndaj ish-funksionarëve dhe funksionarëve të tanishëm të VMRO-DPMNE-së. Ndërkaq akuzon qeverinë se po tenton të bëj shpëqëndrim nga dështimi i referendumit, njofton Portalb.mk.
“Natyrisht, nga mijëra investitorë dhe kompani që kanë punuar në Republikën e Maqedonisë, janë kompani të zgjedhura nga Rusia, Turqia dhe Kina, me qëllim që të krijohet imazh që VMRO-DPMNE politikisht dhe ekonomikisht ka qenë e orienuar drejt këtyre vendeve dhe jo vendet e NATO-s dhe BE-së, edhe pse publikisht është e njohur se të gjitha parametrat, pa marrë parasyshë nëse bëhet fjalë për import-eksportit ose investime të huaja, mbi 90 për qind e bashkëpunimit është me kompanitë nga shtetet anëtare të BE dhe NATO-s, Gjermania, Britania, Amerika, Belgjika, Italia, Holanda, etj “, shkruan Gruevski.
Gruevski ka dhënë shpjegim dhe për rastin që lidhet me financimin e 7 mediave, duke thënë se ndarjen e fondeve për fushatën publike të ish-qeverisë e ka ndarë në përputhje të plotë me ligjin.
Sipas tij, edhe rastet e tjera që i ka hapur PSP janë të montuara dhe kanë të bëjnë me persekutim politik të cilin e udhëheq LSDM ndaj partis së tij. Ai PSP-në e quan instrument klasik të LSDM-së, e cila e ndihmonë qëndrimin e kësaj partie në pushtet.
Këto janë gjashtë rastet e reja që i hapi Prokuroria Speciale Publike
“Pacienti”
Në hetimin me emrin “Pacienti” sipas PSP-së, ekziston dyshim i bazuar për shpërdorim të pozitës dhe autoritetit zyrtar të zyrtarëve dhe personave përgjegjës në procedurat e prokurimit publik për të kryer punë ndërtimore dhe vepra zejtare në më shumë objekte të shëndetit publik në të gjithë vendin. Hetimi përfshin 15 persona, mes tyre dhe ish-Ministri i Shëndetësisë, Bujar Osmani.
“Propaganda”
Në hetimin “Propaganda” të Prokurorisë Speciale Publike (PSP), përfshihen nëntë persona të cilët janë: Nikolla Gruevski, Kiril Bozhinovski, Aco Misajlloski, Emil Parnaxhiski, Vlladisllav Stajkoviq, Sashe Stojanovski, Elena Kolishevska, Marjan Cvetkovski dhe Zaharija Vullkarakis të cilët dyshohen për shkak dyshimit për vepër penale të bërë “shoqërim kriminel” dhe “keqpërdorim të detyrës zyrtare”, transmeton Portalb.mk.
Lëndë e këtij hetimi është ndikimi mbi opinionin publik dhe sigurimi i kontrollit të qarkullimit të informacioneve në mjetet e informimit publik në barë të buxhetit të RM-së, ndërsa në drejtim të mbështetjes së veprimeve të partisë politike VMRO-DPMNE.
“Dhurata”
Të dyshuarit në rastin “Dhurata” Zoran Stavreski, ministër i Financave dhe Mile Janakieski, ministër i Transportit dhe Lidhjeve, me pjesëmarrje në kryerjen e veprës së bashku me të dyshuarin Kërste Miladinov, drejtor i Resurseve Energjetike të Maqedonisë SHA Shkup, në periudhën janar 2012 – korrik 2014, me paramendim e kanë shfrytëzuar detyrën zyrtare dhe autorizimin dhe për kompaninë ruse OAD Strojtransgas nga Moska kanë marrë dobi të kundërligjshme pronësore në vlerë prej2.008.877.000.00 denarë, gjegjësisht afër 33 milionë euro, dhe në vlerë të njëjtë i kanë shkaktuar dëm Buxhetit të RM-së.
LEXO: Hetimi i ri “Dhurata” nga PSP, për herë të parë dyshohet ish-ministri i Financave, Zoran Stavreski
“Disenji”
Me urdhër për zbatimin e procedurës hetimore në rastin “Disenji”, që e hapi sonte Prokuroria Speciale e Maqedonisë janë përfshirë katër persona zyrtarë për shkak të ekzistimit të dyshimit për vepër të kryer penale Keqpërdorimin e pozitës zyrtare dhe autorizimit prej nenit 353 paragrafi 5 lidhur me paragrafin 1 lidhur me nenin 22 të Kodit Penal të RM-së.
Ekziston dyshimi se në periudhën prej vitit 2009 dhe vitit 2010, i dyshuari Mile Janakieski si ministër i Transportit dhe Lidhjeve, e dyshuara Snezhana Filipovska Pavleska si kryetare e Komisionit për zbatimin e furnizimeve publike, ndërsa të dyshuarit Igor Janushev dhe Julia Jankullovska Atanasova, si anëtarë të komisionit për zbatimin e furnizimeve publike, të autobusëve dykatësh për Qytetin e Shkupit, të formuar prej ministrisë, i kanë shfrytëzuar pozitat e tyre zyrtare dhe autorizimet dhe për operatorin ekonomik Jutong nga Kina kanë bërë autorizim të paligjshëm – favorizim në procedurë dhe kontraktimin e marrëveshjes për furnizimin e 202 autobusëve dykatësh, duke i shkaktuar dëm buxhetit të RM-së, në shumë prej 5.000.000 euro.
“Harmonia”
Me urdhër për zbatim të procedurës hetimore në rastin “Harmonia”, që e hapi sonte Prokuroria Speciale e Maqedonisë, janë përfshirë tre persona zyrtarë, për shkak të ekzistimit të dyshimit për vepër të kryer penale Keqpërdorim i pozitës dhe autorizimit zyrtar nga neni 353 paragrafi 3 lidhur me paragrafin 1 lidhur me nenin 22 dhe nenin 45 të Kodit Penal (KP).
Ekziston dyshim i bazuar se në vitin 2012 të dyshuarit Nikolla Gruevski, kryetar i Qeverisë së RM-së, Mile Janakieski si ministër i Transportit dhe Lidhjeve dhe Stevço Jakimovski, kryetar i komunës Karposh, me shfrytëzimin e pozitës së tyre zyrtare, si bashkekzekutues, për Universitetin privat ndërkombëtar ballkanik Shkup kanë fituar dobi të konsiderueshme pronësore në shumë prej 23.730.912 denarëve, përkatësisht 385.868 euro.
LEXO: Hetimi i ri “Harmonia” nga PSP, Nikolla Gruevski dhe Mile Janakieski në krye të dyshimit
“Stacionet bazë”
Me urdhër për realizim të procedurës hetimore në rastin “Stacionet bazë“, që e hapi sonte Prokuroria Speciale e Maqedonisë, është përfshirë një person për shkak të dyshimit për vepër të kryer penale – Keqpërdorim të detyrës zyrtare dhe autorizimeve, sipas nenit 353, paragrafi 5 lidhur me paragrafin 4 dhe 1 të Kodit penal.
Sipas provave, gjatë vitit 2011 i dyshuari Zharko Llukovski, aso kohe ish-drejtor kryesor ekzekutiv në T- Mobile Maqedoni SH.A, duke e shfrytëzuar pozitën dhe autorizimet të SHN Beton SHA Shkup, i ka alokuar përfitim në pronë prej 3.522.400 euro. Njëherësh aksionarëve të T-Moblie Maqedoni, mes të cilëve edhe shtetit i ka shkaktuar dëm në lartësi me të ardhurat e të drejtës së dividendit të parealizuar.
