Takimi Xhaferi-Koja: Misioni i OSBE-së në Shkup do të vazhdojë të bashkëpunojë me institucionet

Kryetari i Kuvendit të Republikës së Maqedonisë, Talat Xhaferi realizoi takim me shefin e porsaemëruar të Misionit të OSBE-së në Shkup, ambasadorin Klemens Koja.

Kryetari Xhaferi ia uroi ambasadorit Koja emërimin në funksion dhe shprehu shpresë për bashkëpunim të mëtutjeshëm të frytshëm, duke e pasur parasysh përvojën e tij në strukturat e OSBE-së, si edhe njohjen e madhe të rajonit.

Kryetari i Kuvendit të Republikës së Maqedonisë, siç thuhet në njoftim për media, ka potencuar se e çmon lartë rolin e OSBE-së në zhvillimin e proceseve demokratike në vend, a sidomos aktivitetet e Misionit në Shkup me të cilin Kuvendi bashkëpunon tani më 26 vite. Ai vlerësoi se neutraliteti i demonstruar dhe kontributi që Misioni e dha në periudhat kritike, janë në dobi të madhe për Republikën e Maqedonisë. Njëkohësisht, ai shprehu kënaqësi për bashkëpunimin e vazhdueshëm të Kuvendit të Republikës së Maqedonisë me OSBE-në, për çka dëshmon intensiteti i takimeve me përfaqësues të lartë të kësaj organizate.

Ambasadori Klemens Koja shprehu kënaqësi që e ndërmerr këtë pozitë të rëndësishme, duke nënvizuar se Misioni i OSBE-së në Shkup do të vazhdojë të bashkëpunojë me institucionet në zbatimin e proceseve reformuese. Ai i përshëndeti përpjekjet e kryetarit Xhaferi për rritjen e standardit në punën e Kuvendit, si edhe për profesionalizimin dhe pavarësinë e shërbimit të Kuvendit.

Bashkëbiseduesit këmbyen opinione për mundësitë për bashkëpunim të ardhshëm ndërmjet Kuvendit të Republikës së Maqedonisë dhe Misionit të OSBE-së në Shkup, veçanërisht në drejtim të mbështetjes të Rrjetit të zyrave për komunikim të qytetarëve me deputetët, për çka Misioni i OSBE-së është i gatshëm të sigurojë trajnim të deputetëve dhe të punësuarve, si edhe pajisje të zyrave.

Në takim u bisedua edhe për fushatën për referendumin e ardhshëm, për qëndrimin e opozitës dhe atmosferën ndër qytetarët për të njëjtin, me ç’rast kryetari Xhaferi vlerësoi se numër gjithnjë më i madh i qytetarëve e kuptojnë nevojën dhe rëndësinë e deklarimit në referendum. Duke e theksuar mbështetjen e lartë të qytetarëve të Republikës së Maqedonisë për anëtarësim në BE dhe NATO, të konfirmuar në anketat e fundit për hulumtimin e opinionit publik, ai vlerësoi se ky përcaktim do të duhet të demonstrohet qartë edhe në referendum.

Kryetari Xhaferi dhe ambasadori Koja e theksuan edhe rolin e Asamblesë Parlamentare të OSBE-së, si faktor shumë i rëndësishëm në strukturën e Organizatës dhe lidhje vitale ndërmjet pjesës qeveritare të OSBE-së dhe deputetëve të cilët janë drejtpërdrejt të zgjedhur nga qytetarët.

Leave a Reply

Your email address will not be published.

Të nderuar komentues! Duke mos dashur të cenojmë opinionet tuaja, lutemi që ato të mos përmbajnë gjuhë të urrejtjes, fyerje dhe ofendime personale dhe të jenë në lidhje me shkrimin, apo temën për të cilën komentohet. Në të kundërtën, nuk do të publikohen. Ju falenderojmë që na ndiqni dhe ju ftojmë të vazhdoni të jeni pjesë e Portalb.mk

*

VERZIONI DESKTOP