Telashet financiare, Modriç i kërkohen 1.2 mln euro

Telashet me organet tatimore spanjolle nuk kanë të përfunduar për Luka Modriç. Sipas të përditshmes spanjolle “El Mundo”, mesfushori kroat që është ende në proces gjyqësor me Agjencinë e Të Ardhurave për evazionin fiskal të periudhës 2013-2014, do të ketë një tjetër përballje me të.

Gjithnjë sipas kësaj të përditshmeje, Agjencia e të Ardhurave ka kërkuar që Modriç të paguajë 1.2 milionë euro të tjera në rrugë administrative. Kjo shifër i përket vitit 2012, kur Modriç u transferua te Reali i Madridit dhe, për këtë institucion, Modriç në atë kohë ishte rezident në Spanjë, kështu që duhet të derdhte tatimet në arkat e shtetit spanjoll, transmeton TCH.

Modriç, që firmosi kontratën e re me Realin e Madridit në fund të muajit gusht të këtij viti, e ka derdhur shifrën e kërkuar nga Agjencia e Të Ardhurave, edhe pse e apeloi vendimin e këtij organizmi.

Për sa i përket konfliktit tjetër të Modriç me Agjencinë e Të ardhurave, kroati akuzohet për shmangien e shumës prej 870.728 euro për vitet 2013 dhe 2014.

Modriç duket se i ka kaluar të drejtat e imazhit të tij në një shoqëri me seli në Luksemburg, të kontrolluar nga ai vet. Mesfushori i Realit të Madridit, për të evituar dënimin me burg, pagoi rreth 1 milion euro për këtë rast, e sipas “El Mundo”, ai është në bisedime me Prokurorinë për arritjen e një pakti konfidencial, duke ndjekur hapat e Cristiano Ronaldos, Marcelos e Jose Mourinhos.

Leave a Reply

Your email address will not be published.

Të nderuar komentues! Duke mos dashur të cenojmë opinionet tuaja, lutemi që ato të mos përmbajnë gjuhë të urrejtjes, fyerje dhe ofendime personale dhe të jenë në lidhje me shkrimin, apo temën për të cilën komentohet. Në të kundërtën, nuk do të publikohen. Ju falenderojmë që na ndiqni dhe ju ftojmë të vazhdoni të jeni pjesë e Portalb.mk

*

VERZIONI DESKTOP