Kuvendi i Shqipërisë miraton rezolutën për diasporën

Kuvendi i Shqipërisë ka mbyllur punimet e sesionit të dytë të legjislaturës së nëntë, duke miratuar në seancën e fundit projektrezolutën “Për reformën e politikës shtetërore për diasporën”, raporton Anadolu Agency (AA).

Rezoluta në fjalë është miratuar me 76 vota pro, ndërsa deputetët e opozitës, konkretisht të Partisë Demokratike të Shqipërisë, nuk ishin pjesë e seancës parlamentare.

Nëpërmjet rezolutës së miratuar Kuvendi i Shqipërisë kërkon zgjidhjen e së drejtës së votës për shtetasit shqiptarë jashtë vendit me mekanizma ligjore nga Komisioni i Reformës Zgjedhore, në bashkëpunim me OSBE-ODHIR.

Gjithashtu, Kuvendi kërkon koordinimin me institucionet përgjegjëse në fushën e diasporës të shtetit të Kosovës për hedhjen e hapave të përbashkët, ku theksohet se është i rëndësishëm edhe bashkëpunimi me shtetet e tjera në rajon.

Sipas rezolutës, kërkohet ndërmarrja e nismave të nevojshme nga organet kompetente për rishikimin e Ligjit “Për Shtetësinë” dhe kuadrit ligjor përkatës për t’u përgjigjur shqetësimeve të shtetasve shqiptarë jashtë vendit dhe fenomenit të “pashtetësisë”.

Ndërkohë, po ashtu kërkohet edhe funksionalizimi i organizimit institucional dhe strukturave shtetërore për diasporën brenda vitit 2018 në bazë të legjislacionit të miratuar.

Kuvendi do të fillojë punimet në sesionin të ri në muajin shtator.

Lajme të ngjashme

Leave a Reply

Your email address will not be published. Required fields are marked *

Back to top button