KUJDES SE MUND TË QANI..!

Tashmë është bërë e zakonshme që gjatë publikimit të ndonjë kënge të re të “këngëtarëve” tanë, si mbishkrim ta vendojnë këtë fjali të çuditshme. Kuptohet, ata e thonë për qëllimet e tyre, pra aludojnë në përmbajtjen sentimentale të këngës se, aq prekëse është sa vështirë do mund t’i përmbanim lotët.

Çfarë injorance…!

Nëse vërtet e kemi kuptuar se populli shqiptar, në të gjitha aspektet është në gjendje të mjeruar; nëse një ditë sa më parë do bien sirenat e alarmit; dhe nëse do duhej patjetër t’ia nisim, t’i ndreqim gjërat, do kisha preferuar të fillojmë nga reduktimi i numrit të këngëtarëve, apo ulja e zërit onomatopeistik të tyre. Zhurma e tyre vrasëse, është duke shkaktuar një degradim të tmerrshëm të kombit.

Përkundër atyre që japin parà të majme për ta, do të kisha dhënë dyfish më shumë, vetëm e vetëm të më qëndrojnë më larg ata kriminelë (këngëtarë) që degjenerojnë dhe ia zënë frymën muzikës sonë fisnike.

Sikur rastësisht të ndodhë që të bien sirenat e shpëtimit, druaj se nuk do të mundim t’i dëgjojmë, ngase kakofonia e zërit të “këngëtarëve” tanë do të jetë gjithmonë më e fuqishme; më e fuqishme edhe nga vetë sirenat që kishin shurdhuar Odiseun.

Ka edhe shumë fusha, por këta janë më zhurmues dhe njëkohësisht, ata që më së shumti e zhvasin popullin me mashtrimet e tyre. Pse dua të fillojmë t’i qërojmë hesapet me ta?

Sepse populli fatkeqësisht nuk lexon, por merren me muzikë dhe me libido, duke shikuar lëkurat e shitura të këngëtareve tona të çakërdisura…dhe kjo natyrisht e ka magjepsur dhe e ka vënë në gjumë popullin.

Kështu janë “këngëtarët” tanë, duke filluar nga reperat, si prijës të ndryshimeve dhe nuhatës të zhanreve komerciale, e deri te tallavaxhinjtë që nuk lanë nuse dhe dhëndër pa i bërë më të mirët.

Bile, së shpejti do ju bashkëngjiten edhe shumë të tjerë.

Kjo pra tregon qartë se çfarë artistësh janë. Ata janë në gjendje të bëjnë gjithçka, vetëm e vetëm të mbërrijnë aty ku synojnë, pra, të ju shkojë pazari mirë. Do gjëmojnë, do vajtojnë, mbase mund t’i ringjallin edhe të vdekurit, do t’i mbledhin bletët, do t’i trembin sorrat, etj…

Vetëm një gjë nuk mund ta bëjnë. Pra, të mësohen shqip të këndojnë.

P.S. Vetëm ky fakt mund të na bëj të qajmë, por jo përmbajtja idioteske e këngëve të tyre.

Lajme të ngjashme

Leave a Reply

Your email address will not be published. Required fields are marked *

Back to top button