Kur do të ngrihet flamuri i të vërtetës shqiptare

Xhabir Ahmeti

Xhabir Ahmeti

Jehonat e vajeve të nënave të vrara nga vitet 12,13, 14, 15 , të të gjitha viteve të tjera midis dy luftërave botërore edhe të kohës së Jugosllavisë socialiste ende përplasen nga një shullë në një benë të bjeshkëve tona të shkelura nga opingat e gjakësorit Bozhidar Jankoviç hordhitë e të cilit e okupuan Kosovën dhe viset shqiptare në Maqedoni. Askush një fjalë nuk e shkroi.

Ende dëgjohen britmat e vajzave të përdhunuara nga Kreta e në Tivar, nga Piroti e në Athinë. Për njëqind e sa vjet me radhë. Asnjë institut për gjuhë, letërsi e kulturë shqiptare një projekt të vogël s’e bëri për këto krime.

Kanë mbetur gjurmët e zeza e çizmeve të aleancës së mallkuar ballkanike dhe të bollës së plagosur osmane mbi fushat e buta arbërore në të cilat nuk mbin kurrë më bari. Nuk e thanë një fjalë akademitë e shkencave e të arteve se cila ishte e vërteta e grabitjes së tokave tona.

Nuk pushojnë thirrjet për ndihmë nga puset, barret masive e humnerat ku kanë mbetur fshatarët e vrarë shqiptarë gjatë terroreve të fqinjëve. Këto viktima  kërkojnë që dikush t’i shkruajë në libër me mijëra faqe torturat që u uhstruan mbi ta e titulli klibrit të jetë Golgotha shqiptare. Historianët heshtin. Institutet, po ashtu. Bashkë me ta edhe të gjitha institucionet tjera.

Kanë mbetur në ajër të papikturuar fëmijët e ngulur në kamat e ushtarëve të Bozhidar Jankoviçit që e lau Kosovën dhe Maqedoninë veriore e perëndimore me gjakun e shqiptarëve. Asnjë qeveri nuk ndau një metelik për të shpallur konkurs për piktura e skulptura dhe për vepra muzikore në këtë temë.

Janë shndërruar në pluhur të harresës zullumet e pandurëve dhe poreznikëve serbë të kralevinës që dogjën me qindra fshatra shqiptare. Katedrat e historisë  vetëm prodhojnë doktorë shkencash  të cilët s’e mbajnë dot mbi shpinën e tyre peshën e historisë.

Është shpallur si fitore gjenocidi dhe pastrimi gjakatar etnik i shqiptarëve që nga luftërat ballkanike e deri në shpërbërjen e Jugosllavisë. Nuk kanë bëzajtur redaksitë, të gjitha shtëpitë botuese anë e kënd hapësirës etnike shqiptare.

Është asimiluar Sanxhaku e Reka. Po harrohen shqiptarët që dikur jetonin në Mal të Zi. Ka mbetur ndonjë klithmë në këngët popullore, të cilat s’ka kush i mbledh.

Na i kanë përvetësuar vallet, zakonet e traditës, e përvetësojnë Skënderbeun, nënën e tij. S’ka kush u jep një përgjigje.

Dalin gjithfarë buroviçësh e korbash të tjerë që shpikin gënjeshtra nga më monstruozet… Dalin gjithfarë lifash e lahperësh gazetareskë nga të gjitha viset ballkanike shajnë, fyejnë e mohojnë… Jepen gjithfarë deklaratash antishqiptare qeveritare, shkruhen gjithfarë enciklopedish rrugaçësh ku na trajtojnë si malokë e njerëz të egër… I heshtin vlerat tona muzikore, baletore, letrare, në pikturë e shkencë e ekonomi që arrihen në botë dhe mundohen t’i fusin nën cergën e mesatares së tyre për të na paraqitur para publikut të tyre si primitivë dhe si të rënë nga mali…E shajnë gjuhën shqipe, e trajtojnë si gjuhë e pashkruar, si gjuhë për përdorim brendashtëpiak… Na përqeshin nëpër tubime partiake e në deklarata të funskionarëve të ndryshëm… Na kërcënohen… Na i rrënojnë përmendoret fetare tradicionale, qofshin kisha a xhami dhe na çojnë të bëjmë ndërtime të reja kiçi për të dëshmuar se ne tash e kemi nismën, zanafillën… Se jemi pa të kaluar… Dhe, partitë tona politike vetëm përlahen, shajnë njëri-tjetrin, fyejnë vetveten… Kurrsesi nuk bëhen bashkë për ta thënë me një zë të vërtetën, për të krijuar kushte që me këmbime studentësh, profesorësh e ekspertësh nga të gjitha trojet tona etnike të fillojë të ngrihet kështjella shkencore, letrare dhe politike kombëtare e cila do ta ngrejë lartë në Evropë flamurin e të vërtetës. Këta në gojë i kanë vetëm integrimet evropiane e atlantike. Por nuk na e thonë se cila do të jetë brendia e këtyre integrimeve dhe cili është interesi ynë. Dhe, flamuri jonë mbetet i pashpaluar.

E kur do të ngrihet flamuri i të vërtetës shqiptare? Kur do të ndrijnë yjet në qiellin tonë të përhimtë? Kur do të hiqet hija e rëndë e gënjeshtrës që po shpërndahet edhe sot e kësaj dite? Kur?

Shkrimi është shkruar enkas për Portalb.mk. Të drejtat e publikimit i kanë vetëm ©Portalb.mk dhe autori, sipas marrëveshjes mes tyre.

Leave a Reply

Your email address will not be published.

Të nderuar komentues! Duke mos dashur të cenojmë opinionet tuaja, lutemi që ato të mos përmbajnë gjuhë të urrejtjes, fyerje dhe ofendime personale dhe të jenë në lidhje me shkrimin, apo temën për të cilën komentohet. Në të kundërtën, nuk do të publikohen. Ju falenderojmë që na ndiqni dhe ju ftojmë të vazhdoni të jeni pjesë e Portalb.mk

*

VERZIONI DESKTOP