Tërmet prej 5,3 ballësh në Havai

Një tërmet prej 5,3 ballësh sipas shkallës së Rihterit ka goditur shtetin amerikan Hawaii, transmeton Anadolu Agency (AA).

Në një deklaratë nga Qendra e Hulumtimeve Gjeologjike të SHBA-ve thuhet se tërmeti prej 5,3 ballësh, i cili ka ndodhur 5 kilometra në jugperëndim të Vullkanit Kilauea, është regjistruar 500 metra në thellësi të tokës.

Në deklaratë po ashtu bëhet e ditur se tërmeti në fjalë ka lidhje me shpërthimin e hirit që ndodhi në kraterin Halema’uma të Vullkanit Kilauea.

Ekspertët paralajmëruan shoferët se hiri i hedhur i vullkanit mund të shkaktojë probleme dhe se rrugët mund të jenë të rrëshqitshme.

Që nga fillimi i muajit maj, kur u aktivizua Vullkani Kilauea në Hawaii, në rajon kanë ndodhur 9 mijë e 900 tërmete.

Tërmeti më i madh ka ndodhur më 4 maj prej 6,9 ballësh. Ditën e njëjtë ishte aktivizuar Vullkani Kilauea, i cili ende vazhdon të hedhë lavë dhe hi.

Në vullkanin Kilauea, një nga vullkanet më aktivë në botë, ndodhin shpërthime që nga viti 1983.