Sihana Badivuku dhe Derek Han sot sjellin koncert në Filarmoninë e Maqedonisë (FOTO)

Sihana Badivuku me violinë dhe Derek Han me piano, sot, me fillim prej ora 20:00 do të mbajnë koncert në Filarmoninë e Maqedonisë, njofton Portalb.mk.

Koncerti i dedikohet Hysen Badivukut dhe Lit Sien Han.

Në moshën 79 vjeçare Hysen Badivuku ndërroi jetë më 24 maj 2017. Ai ishte një ndër violinistët e parë të Kosovës dhe për një kohë të gjatë ishte pjesëtar i Orkestrës së Filarmonisë së Kosovës.

Badivuku qysh prej fillimit të viteve ‘60 e deri në fillim të viteve ’90, kur regjimi serb mbylli institucionet, ishte pjesë e Orkestrës Popullore të RTP-së. Për gati një dekadë pasluftës ishte angazhuar në Filarmoninë e Kosovës ku kishte rol të dyfishtë: violinist dhe mbajtës i arkivit. Krahas pjesmarrjes së tij në Filarmoni, ai gjithashtu ka qenë autor i shumë këngëve të këngëtareve të mëdha, siç është rasti me Shpresa Berishën.

Ndryshe, Hysni Badivuku është babai i violinistes së shquar shqiptare, Sihana Badivuku.