Nuk foli diaspora!

Florim Zeqa

Florim Zeqa

Saktësisht pesë vite më parë gjatë një tubimi me bashkatdhetarë, organizuar nga sekserët e qeverisë, në Treviso të Italisë me 13.04.2013, një afarist nga Kosova, me të marr fjalën ju drejtua përfaqësuesve të shtetit të Kosovës me fjalët “Me nder me thanë”,…ky ishte edhe momenti i përfundimit të fjalës, ngase atij i ndalet mikrofoni nga drejtuesi i këtij tubimi.

Meqenëse paraprakisht afaristit në fjalë, të njëjtat probleme me mikrofonin i kisha edhe unë gjatë fjalës sime, i ofrohem bashkatdhetarit të dëshpëruar me këto fjalë; “Unë e di pse ma ndalen mikrofonin, po ti çfarë halli ke me ta!?”

Përgjigja e afaristit ishte kjo; “Eh more vëlla, shkova në Kosovë të filloj një biznes në vlerë rreth 500 mijë euro, por me të bërë kërkesën në Qeveri, më erdhën të shpija dhe më kërkuan 100 mijë euro haraç,…si pasojë e kësaj 500 mijë eurot e mia u detyrova t’i investoj në Mal të Zi…”

Konferenca katër ditore “Diaspora Flet”, e organizuar nga “GERMIN” (nën patronatin e sekserëve të pushtetit), e mbajtur nga 17-20 Maj 2018 në Prishtinë, edhe përkundër qëllimit të mirë të disa pjesëmarrësve në këtë aktivitet puro biznesor, nuk paraqet ndonjë zhvillim pozitiv sa i përket të ardhmes së ndritshme të vendit tonë.

Fillimisht duhet cekur se organizata “GERMIN” dhe themeluesi “Diaspora Matters”, zotëria nga Irlanda, Kignsley Aikins nuk kanë gjë të përbashkët dhe nuk të drejt të flasin në emër të mërgatës shqiptare në botë.

Në anën tjetër, në këtë konferencë ka munguar edhe përfaqësimi dinjitoz i mërgatës nga shtetet ku graviton mërgata jonë. Pa dashur të ndalem tutje në aspektet e përfaqësimit, mënyra e organizimit dhe pjesëmarrja e tregojnë qëllimin e saj.

Konferenca “Diaspora flet”, përkundër mangësive të shumta, e ka arritur qëllimin e organizatorit (sekserëve të pushtetit), e për më shumë se kaq, ka kënaqur egon e pushtetarëve.

Në rrethanat aktuale, kur vendet tona (Shqipëria, Kosova dhe Ilirida) qeverisen nga pushtetet e inkriminuara dhe korruptuara skajshmërish, asgjë e mirë nuk mund të arrihet përmes tyre.

Ministrat e Diasporës së vendeve tona: Dardan Gashi, Pandeli Majko dhe Edmond Ademi përveçse sinonim i korrupsionit dhe vazhdimësi e pushteteve antipopullore, janë vegla të shefave të tyre në shtetet që përfaqësojnë.

Pasi asnjëri prej ministrave të sipërpërmendur nuk kanë asgjë të përbashkët me mërgatën tonë.

Diaspora që mbështet pushtetarët, nuk ndihmon qytetarët

Ajo pjesë e mërgatës sonë që mbështet pushtetarët kriminelë dhe të korruptuar, përveçse nuk ndihmon bashkatdhetarët, ua vazhdon akoma më tepër vuajtjet e qytetarëve të varfër në trojet tona etnike.

Lidhja i Diasporës Shqiptare me atdheun assesi nuk bëhet përmes pushtetarëve të inkriminuar që ua bënë jetën ferr qytetarëve.

“Promovimi i dialogut të dy-anshëm në mes të institucioneve qeveritare dhe Diasporës”, përveçse slogan irritues dhe turpërues, është mashtrues dhe tendencioz.

Kjo, në radhë të parë ndan shqiptarët në dy taborë; në vendas dhe të huaj!

Vallë çfarë dialogu u dashka të zhvillohet mes pushtetarëve të korruptuar dhe mërgimtarëve të pastër si loti!?

Pushtetarët e korruptuar dhe inkriminuar nuk largohen me lutje dhe dialog, ata largohen nga pushteti me zemërimin e qytetarëve të shprehur përmes votës së lirë dhe bojkotin e mërgatës me remitencat e saj.

“Diaspora flet”, improvizim i radhës i pushtetarëve

Asnjëherë mërgimtarët nuk kanë qenë më të anashkaluar dhe larguar nga vendimmarrja në vendin e tyre. Ngushtimi i hapësirës së veprimit dhe pjesëmarrjes së mërgatës në jetën publike është rezultat i ngufatjes së shtetit nga uzurpatorët, zuzarët dhe urithët e nëntokës kriminale. Shkaku i politikës diskriminuese në njërën anë dhe aplikimit të haraçit ndaj bizneseve shqiptare në anën tjetër, gjithnjë e më pak kemi investime të mërgatës në vendlindje.

Dyert e hapura për investime i kanë vetëm ato biznese që janë vënë në shërbim të krimit të organizuar shtetëror, kontrabandës dhe shpëlarjes së parave të pista të pushtetarëve.

Andaj, shkaku i situatës së krijuar në vendin tonë, është bërë i pamundur edhe aplikimi i përvojave të “Diasporave” të huaja në vendin tonë.

Hapja e dyerve të Kuvendit të Kosovës për “Diaspora flet”, është mbyllje e dyerve për Diasporën që flet çdo ditë me zë të lartë për pushtetarët e korruptuar, për krimin e organizuar dhe abuzimin e buxhetit të shtetit nga elitat politike në pushtet.

Konferenca nuk korrespondon as me kohën dhe as përmbajtjen e saj

Konferencat me Diasporën, përkatësisht me mërgatën tonë nuk organizohen në trajtën e “çarkut të mbyllur”, por duhet të jenë të organizuara ekskluzivisht nga njerëzit e vullnetit të mirë dhe pa prezencën e pushtetarëve të korruptuar, me qëllimin e vetëm për gjetjen e rrugëdaljes nga izolimi ndërkombëtar dhe hapjen e perspektivave zhvillimore të vendeve tona.

Në të kundërtën, kjo mënyrë e lidhjes dhe komunikimit me pushtetarët, jo vetëm që do t’i mbyllë akoma më tepër mundësitë e zhvillimit ekonomik, do të ndikojë në zbrazjen e trojeve tona etnike nga popullata autoktone shqiptare.

Ngase, shqiptarët e lodhur nga denigrimi social dhe kulturor që u shkaktoi politika, dita-ditës janë duke i braktisur vatrat e tyre, duke ikur drejt vendeve evro-perëndimore në kërkim të një jete më të mirë.

Plaçkitja e mërgimtarëve nga pushtetarët vazhdon…

Përveç fakteve të sipërpërmendura, mërgimtarët akoma vazhdojnë të plaçkiten në emër të përshpejtimit të procedurave për nxjerrje të dokumenteve të udhëtimit në vendet e tyre, paguajnë plaçkën në mungesë të Kartonit të Gjelbër e deri të plaçkitja përmes faturave të energjisë elektrike edhe kur orët elektrike i kanë të ngrira.

Tendenca në rritje për plaçkitjen e mërgimtarëve, dëshmohet nga ideja e një ministri të krisur të diasporës (Dradan Gashi), për themelimin e një “Banke për Diasporën”, me qëllim të thithjes akoma më të madhe djersës dhe mundit të bashkatdhetarëve.

Ministri famëkeq nuk u ndal me kaq, ai paralajmëroj edhe shtimin e stafit diplomatik me emërimin e të ashtuquajturve “atashe diplomatik” (nëpunës që drejton një fushë veprimtarie në një përfaqësi diplomatike), të cilët nuk do jenë gjë tjetër veqse dorë e zgjatur e pushtetit nga sekserët e tyre në Diasporë.

Ashtu siç e nisa me shqetësimet e Diasporës në tubimin e mbajtur në qytetin Treviso të Italisë, më rastin e shpalosjes së “Konceptit për Draft-strategjinë për Diasporën dhe Mërgatën 2013-2018” nga përfaqësuesit e Qeverisë së Kosovës, duhet edhe ta përfundoj me kërkesat e mërgatës në ditët e sotme.

Diaspora ka nevojë për përfaqësim dhe trajtim dinjitoz në vendlindje, duke filluar nga hyrja në kufij, me heqjen e barrierave të krijuara në formë “gjobe” mbi sigurimin e automjeteve, të marrjes së “mitës” për nxjerrjen e dokumenteve e deri të format e “haraçit” për bizneset familjare të mërgatës sonë!

Diaspora kërkon të drejtën për të zgjedhur dhe për të qenë e zgjedhur, përmes subjekteve politike e jo si deri më tani, e harruar dhe nëpërkëmbur nga pushtetarët dhe partitë politike ekzistuese. Me një fjalë, mërgimtarët, nga shteti i tyre kërkojnë trajtim dinjitoz e jo privilegje!

Koincidencë apo rastësi, sikurse pesë vite me parë në tubimin në Itali, që ishte pjesë e panelit drejtues, i njëjti person ishte edhe në konferencën “Diaspora flet”, përparim apo vendnumërim!?

E vërteta e hidhur është kjo, edhe kësaj radhe nuk foli Diaspora!

Leave a Reply

Your email address will not be published.

Të nderuar komentues! Duke mos dashur të cenojmë opinionet tuaja, lutemi që ato të mos përmbajnë gjuhë të urrejtjes, fyerje dhe ofendime personale dhe të jenë në lidhje me shkrimin, apo temën për të cilën komentohet. Në të kundërtën, nuk do të publikohen. Ju falenderojmë që na ndiqni dhe ju ftojmë të vazhdoni të jeni pjesë e Portalb.mk

*

VERZIONI DESKTOP