Francezët injorojnë nacionalizmin serb
Huliganët serbë kanë dështuar në tentativën e tyre për të dhënë mesazhe nacionaliste gjatë ndeshjes miqësore Francë-Serbi që u zhvillua në qytetin e Reims. Sipas “Associated Press”, huliganët serbë kënduan emrin e Ratko Mlladiç dhe mbajtën pankarta kundër pavarësisë së Kosovës ndërsa po hynin në stadiumin “August Delaune”.
Grupi që përbëhej nga 35-40 persona, ku përfshiheshin disa ultras të klubit francez PSZH, shpalosën një parullë ku shkruhej “Kosova është Serbi” dhe kënduan në kor emrin e Mlladiç ndërsa filmonin veten që të dukej sikur ishte një tubim madhështor. Por ato u injoruan tërësisht edhe nga policia franceze që i ndiqte vetëm me vetura dhe nuk ndërhyri as kur ato ndezën fishekzjarre.
Në momentin kur ata i janë afruar stadiumit, tifozët e tjerë kanë vërshëllyer në kor kundër thirrjeve të tyre nacionaliste duke bërë që turma e huliganëve serb të pushonte për disa minuta. Për më tepër, tifozë kanë filluar të thërrasin dhe të akuzojnë tifozët e PSZH për huliganizëm, ndërsa janë evituar përplasje të dhunshme mes palëve.
Ky grup huliganësh, pasi ka hyrë në stadium ka tentuar t’i bëjë “reklamë” vetes duke thirrur vazhdimisht emrin e Ratko Mlladiç, por është injoruar plotësisht nga të pranishmit në stadium të cilët kanë ndjekur me qetësi ndeshjen pa iu përgjigjur provokimeve të tyre.