Shkodër, në pranga kreu i Komunës Rrethinë

Policia e Shkodrës prangosi ditën e premte kryetarin e Komunës Rrethinë, 38-vjeçarin Kleves Muja.

Muja u prangos për llogari të drejtësisë italiane. Ai akuzohet nga autoritetet e vendit fqinj për trafik me lëndë narkotike.

Emri i drejtuesit të lartë lokal në Komunën e Rrethinës në Shkodër mësohet se është dorëzuar në listën me dhjetra emra që drejtësia italiane i ka dorëzuar policisë shqiptare. Pjesa më e madhe e të kërkuarve akuzohen për trafik të lëndëve narkotike, shfrytëzim prostitucioni apo vjedhje.

Kleves Muja është zyrtari i dytë i pushtetit lokal që kërkohet nga drejtësia italiane. Emri i parë i bërë publik ishte ai i Fatmir Kajollit, anëtar republikan i Këshilllit të Qarkut në Fier. Ndaj Kajollit ka dy vendime të gjykatave italiane, një vendim me 24 vjet burg dhe një tjetër me 16 vjet.