Sulme ajrore në Idlib, disa të vdekur
Në një sulm ajror ndaj vendbanimeve civile brenda kufijve të “zonës së deeskalimit” në Idlib në Siri, 3 civilë kanë humbur jetën, raporton Anadolu Agency (AA).
Në një deklaratë për AA, drejtori i Mbrojtjes Civile në Idlib (Helmetat e Bardhë), Mustafa Haxh Jusuf, tha se zonat rurale të qytetit të Idlibit që nga orët e mëngjesit po i nënshtrohen sulmeve intensive ajrore.
Ai bëri të ditur se si pasojë e sulmeve ajrore ndaj vendbanimit civil në fshatin Nikayir në jug të Idlibit 3 fëmijë nga e njëjta familje kanë humbur jetën dhe se 3 civilë të tjerë janë plagosur. Sipas tij, fshatrat në zonën rurale në jug të Idlibit po i nënshtrohen sulmeve ajrore dhe tokësore.
Sipas të dhënave të publikuara nga Drejtoria e Mbrojtjes Civile në Idlib (Helmetat e Bardha) lidhur me numrin e të vdekurve si rezultat i sulmeve ajrore dhe tokësore të regjimit të Asadit dhe përkrahësve të tij, gjithsej 666 civilë e kanë humbur jetën, ndërsa 4.204 civilë janë plagosur.
Idlibi, i cili ndodhet në veri të Sirisë dhe në kufi me Turqinë, në takimin e Astanës më 4-5 maj të vitit 2017 ishte shpallur si “zonë e deeskalimit”. Rajoni i cili ndodhet nën kontroll të opozitarëve ushtarakë dhe grupeve të armatosura kundër regjimit, ende po i nënshtrohet sulmeve të regjimit të Asadit dhe kohë pas kohe edhe të Rusisë.
