Në UEJL nuk do të ketë më fakultet të administratës publike

Nga viti i ardhshëm akademik 2018/2019, Universiteti i Evropës Juglindore në Tetovë do të del me një ofertë të re akademike – atë të shkencave shoqërore. Bëhet fjalë për Fakultetin e Shkencave Shoqërore Bashkëkohore (FSHSHB), i cili do të zëvendësojë Fakultetin e Administrimit Publik dhe Shkencave Politike (FAPSHP) që me gjasë do të pushojë së vepruari, apo e thënë ndryshe – nuk do të regjistrojë më studentë në drejtimet për të cilat ishte themeluar në vitin 2001, shkruan gazeta KOHA.

Në konkursin për regjistrimin e studentëve në vitin 2018/2019, në vend të FAPSHP qëndron FSHSHB ku janë planifikuar të regjistrohen numri më i madh i studentëve, 390 gjithsej të shpërndarë në grupet e studimeve në gjuhën shqipe (240), maqedonase (130) dhe angleze (20).

E parë nga numri i vendeve të rezervuara, FSHSHB-ja është në pozita të njëjta me ato që kishte ish-FAPSHP-ja. Deri vitin akademik 2017/2018, ai fakultet përbente njësinë më të madhe akademike në kuadër të UEJL-së dhe të njëjtën pritet të bëjë tani FSHSHB-ja.

Ndryshimi qëndron në gërshetimin e fakultetit “të ri” me fakultetin “e vjetër”, konkretisht në dhënien e programeve të reja të cilat i ofron FSHSHB pa hequr dorë nga disa prej programeve të FAPSH-së. Në kuadrin e programeve të reja ofrohen drejtimet: Menaxhment i Organizatave Joqeveritare, Punë dhe Politikë Sociale, si dhe Sociologjia, ndërsa do të vijojnë me ofertën edhe drejtimet: Menaxhment Publik dhe Politika Publike, Shkencat Politike dhe Marrëdhëniet Ndërkombëtare.

Studimet e administratës publike, që me gjasë do ti kalojnë historisë, u themeluan bashkë me themelimin e UEJL-së, si fakultet i parë dhe i vetëm i këtij lloji në Maqedoni. Qëllimi ishte përgatitja e kuadrove me shkathtësi për nevojat e administratës në institucionet publike dhe private me atë që gjatë studimeve të fitohen njohuri nga sfera e menaxhimit publik, drejtësisë, ekonomisë, komunikimi, e kështu me radhë.

Nga vitin 2018/2019, UEJL ka bërë rishqyrtimin e programeve në përputhje me nevojat e tregut duke ofruar studime në sferën e menaxhimit të organizatave joqeveritare, sociologjisë dhe shkencave sociale. FSHSHB është promovuar si risia e ofertës akademike të UEJL-së nga rektori prof. dr. Zamir Dika në aktivitetin “Ditët e Hapura në UEJL”. Ai, ka thënë gjithashtu se për vitin 2018/2019 planifikojnë të regjistrojnë rreth 800 studentë në nivelin e studimeve deridiplomike dhe 400 në studimet e magjistraturës.

Në konkursin për regjistrimin e studentëve të rinj, në pese fakultete e UIEJL-së janë planifikuar 1.095 vende, prej të cilave 735 në gjuhën shqipe, 240 në gjuhën maqedonase dhe 120 në gjuhën angleze.

Leave a Reply

Your email address will not be published.

Të nderuar komentues! Duke mos dashur të cenojmë opinionet tuaja, lutemi që ato të mos përmbajnë gjuhë të urrejtjes, fyerje dhe ofendime personale dhe të jenë në lidhje me shkrimin, apo temën për të cilën komentohet. Në të kundërtën, nuk do të publikohen. Ju falenderojmë që na ndiqni dhe ju ftojmë të vazhdoni të jeni pjesë e Portalb.mk

*

VERZIONI DESKTOP