A e dëgjon këngën e liqenit
Përkundet sulja në liqen midis valëve
Në shpirt thyhet jehona e këngës
A e dëgjon këngën e pulëbardhave o peshkatar
Se si rrëshqet midis valëve pas ndonjë peshku të artë
Jehona në shpirt jehona në gjak bardh
ndarjet pelin dhe një guxim në breg
A e ndjen largimin e barkave lamtumirëse
Kur pulëbardhat vrapojnë pas tyre në kaltëri
Gëzimin e valës së ngrohtë midis syve
Një vrap prej ngjyrës një dështim gjaku
Sa të largët e paske lirën
Kurse gjëma të dëgjohet deri te burimet
Një grumbull i madh gurësh nën hijen e mollës
Në kopshtin e gurtë në ishullthin e liqenit
Dhe kjasina që e ushqen përroin e etjes
Një zë shumë zëre buzë liqenit
Një dëshirë shumë dëshira në brigjet e ftohta
Një kujtim në vazon me lule që e ke ujitur për mëshirë
Një shikim aq i lehtë kah vrapimet
E aq i rëndë e brutal
Dhe pulëbardhat që i përzë terri
Në thellësitë e të panjohurës
Poezi nga Asllan SELMANI
Zgjodhi Xhabir AHMETI