Bisedimet Kore e Veriut-SHBA, asnjë përgjigje nga Peniani

Koreja e Jugut nuk ka marrë ende një përgjigje nga Peniani për një takim mes liderit koreano-verior, Kim Jong-un dhe presidentit amerikan, Donald Trump.

“Ne nuk kemi parë dhe as nuk kemi marrë një përgjigje zyrtare nga regjimi koreano-verior në lidhje me takimin kore e Veriut-ShBA. Mendoj se ata po e trajtojnë këtë çështje me maturi dhe kanë nevojë për kohë që të organizojnë qëndrimin e tyre”, tha një zëdhënës i Ministrisë Koreano-jugore të Unifikimit, transmeton TCH.

Zyrtarët koreano-jugorë janë nisur edhe drejt Kinës për të diskutuar mbi takimin me homologët në Pekin, që shihet edhe si mbështetësi i fundit i regjimit koreano-verior. Ata do të udhëtojnë më pas drejt Japonisë, që ashtu si SHBA është kërcënuar disa herë nga Peniani. Propozimi i papritur për një takim vjen pas më shumë se një viti retorikash të nxehta mes Koresë së Veriut dhe SHBA-së dhe shqetësimit global se armiqësitë mund të përshkallëzohen deri në konfrontim ushtarak.

Koreja e Veriut ka kryer disa teste bërthamore gjatë viteve të shkuara dhe ka zhvilluar raketat me rreze të gjatë veprimi që thotë se mund të hedhin testata bërthamore deri në SHBA-në kontinentale. Bisedimet mes dy vendeve do të shënonin një hap të paprecedentë në konflikt pasi asnjë president në detyrë nuk është takuar ndonjëherë me një lider koreano-verior.

Sidoqoftë, detajet mbeten të paqarta. Analistët ndërkohë mbeten skeptikë për atë se çfarë mund të arrihet përmes bisedimeve, kjo falë kompleksitetit të çështjeve që janë në lojë.

Leave a Reply

Your email address will not be published.

Të nderuar komentues! Duke mos dashur të cenojmë opinionet tuaja, lutemi që ato të mos përmbajnë gjuhë të urrejtjes, fyerje dhe ofendime personale dhe të jenë në lidhje me shkrimin, apo temën për të cilën komentohet. Në të kundërtën, nuk do të publikohen. Ju falenderojmë që na ndiqni dhe ju ftojmë të vazhdoni të jeni pjesë e Portalb.mk

*

VERZIONI DESKTOP