Turqia lëshon urdhër-arreste edhe për mbi 240 njerëz

Prokurorët turq kanë lëshuar urdhër-arreste për 243 njerëz, përfshirë 92 mësues, nën dyshimet se ata kanë lidhje me klerikun fetar, Fethullah Gulen.

Ankaraja e fajëson Gulenin për organizimin e përpjekjes për grushtshtet, në vitin 2016, por Gulen i mohon akuzat.

Mësimdhënësit e 20 provincave kanë punuar në shkolla që janë mbyllur më herët për shkak të lidhjeve të dyshuara me Gulenin, raporton agencia turke e lajmeve Anadolu Agency.

Pesëdhjeteshtatë veta të tjerë kërkohen për përdorim të ByLock, një aplikacion i koduar i mesazheve, për të cilin qeveria thotë se është përdorur nga rrjeti i Gulenit.

Mbi 50,000 njerëz janë burgosur dhe mbi 150,000 të tjerë janë shkarkuar ose pezulluar nga ushtria, shkollat dhe institucionet publike, që nga puçi i dështuar më 15 korrik, 2016.

Mbi 250 veta janë vrarë në trazirat e asaj dite.

Kritikët thonë se presidenti turk, Recep Tayyip Erdogan, e ka shfrytëzuar përpjekjen për grushtshtet si pretekst për të heshtur disidentët.

Turqia thotë se masat strikte janë të nevojshme për shkak të kërcënimeve të sigurisë me të cilat ballafaqohet.