ZONJAT MADHËSHTORE

Salajdin Salihu

Salajdin Salihu

Në sisteme tiranike mësuesit idealistë ngjajnë me Prometheun; me të rebeluarin kundër diktatit e obskurantizmit, i cili njerëzve ua dha zjarrin – simbolin e dijes dhe të dritës.

Akti i tij është simbol i mbrojtjes së dinjitetit të nëpërkëmbur njerëzor në kushte tiranie. Se në kushte robërie e pëson dinjiteti i njeriut.

Mësuesit shqiptarë shpesh e kanë përjetuar fatin e këtij heroi mitik. Ata, nëpërmjet sakrificës mbinjerëzore, ndikuan në ngritjen kulturore të njerëzve.

Në këtë përvjetor të shkollës së parë shqipe (ndonëse ky formulim është i kontestueshëm), dua ta theksoj kontributin e Zonjave të Nderuara, pranë së cilave ndjehem i vogël. Disa prej tyre nuk rrojnë më. Ato i kam admiruar dhe i admiroj deri në përkulje. Janë, pra, Mësueset e para. Misioni i tyre ka qenë i vështirë, sepse një mjedis i zhytur në terrin e mosdijes, i ka paragjykuar. Nuk është e lehtë që të veprosh në një ambient të tillë pa u ligështuar. Vetëm të fuqishmit, që kanë ndërmarrë një mision të fisëm, nuk zmbrapsen.

Ato kurrë nuk janë ankuar se “nuk i kupton populli”, siç flasin sot shumë snobë, që nuk e kanë kuptuar esencën e misionit intelektual. Se është i dituri që duhet të kujdeset për të paditurin, thoshte Mithat Frashëri.

Misioni i këtyre Zonjave të Nderuara ka qenë i vështirë edhe për shkakun se kanë vepruar në një regjim totalitar, tepër armiqësor ndaj Mësuesit.

Ato, me mund e me sakrificë, e kanë shpërndarë dritën e dijes ndër breza. Kanë punuar në heshtje për ngritjen kulturore ndër këto vise, pa kërkuar që t’u shpërblehej mundi, aq sa e meritonin.

Te grekët e lashtë e kemi fjalën “kallokagatia”, që shenjon bukurinë, mirësinë dhe vlerën supreme morale. Ky ishte ideali etik i grekëve të lashtë. Pra, etikja e gërshetuar me estetikën. Sipas grekëve të lashtë arsimi ishte kulmi i bukurisë.

Zonjat e Nderuara u angazhuan një jetë për këtë ideal të fisëm. U angazhuan për të na lartësuar në kulmin e bukurisë dhe mirësisë.

Të nderuarat Zonja, me vështrimet e thella, si dy oqeane të mbushura me mirësi e humanizëm, ato, pra, të thjeshtat dhe madhështoret, që ndjejnë lumturi për çdo sukses të nxënësve të tyre, meritojnë respektin e përgjithmonshëm. Duke i nderuar ato, në fakt, e nderojmë vetveten.

Shkrimi është shkruar enkas për Portalb.mk. Të drejtat e publikimit i kanë vetëm ©Portalb.mk dhe autori, sipas marrëveshjes mes tyre.

Leave a Reply

Your email address will not be published.

Të nderuar komentues! Duke mos dashur të cenojmë opinionet tuaja, lutemi që ato të mos përmbajnë gjuhë të urrejtjes, fyerje dhe ofendime personale dhe të jenë në lidhje me shkrimin, apo temën për të cilën komentohet. Në të kundërtën, nuk do të publikohen. Ju falenderojmë që na ndiqni dhe ju ftojmë të vazhdoni të jeni pjesë e Portalb.mk

*

VERZIONI DESKTOP