Një jetë kushtuar dijes dhe arsimit

Florije Shaini

Florije Shaini

Disa fjalë mirënjohëse kushtuar prof.dr.Remzi Nesimit për nder të 7 Marsit

7 Marsi dita e mësuesit, atyre dhe vetëm atyre, që mbajnë lart emrin dhe etikën e emrit mësues. Të flasësh e të shkruash për jetën dhe veprën e atyre që gjithë jetën ia kushtuan arsimit, dijes e edukimit të brezave të ri nuk është detyrë fort e lehtë, sidomos kur kemi të bëjmë me personalitet siç ishte profesor Remzi Nesimit. Pra, është detyrim i madh sa intelektual, por edhe moral, sepse duhet menduar dhe përzgjedhur mirë fjalët për të evidentuar ato vlera që e cilësojnë një personalitet të këtillë.

Janë shumë të rrallë njerëzit si profesor Nesimi, që në personalitetin e tyre i kanë të gërshetuara vlerat më të larta njerëzore si urtësinë, bujarinë, edukimin e lartë akademik, atdhetar dhe fetar, sinqeritetin dhe virtualitetin në komunikim me njerëzit.

Profesori i nderuar më se gjysmë shekulli, ka punuar për ngritjen e përgjithshme arsimore e kulturore dhe të vetëdijes kombëtare të popullit shqiptar, për të lëvruar, kodifikuar dhe përpunuar shqipen standarde.

Nga pjesëmarrja në Kongresin e Drejtshkrimit, nga ligjërimet e shkrimet e profesor Remziut mund të nxirret porosia se jemi një komb, prandaj duhet të kemi një gjuhë të përbashkët. Ai vazhdimisht ka shkruar e folur për pastrimin, pasurimin e shqipes dhe përgjithësisht për ngritjen e kulturës së gjuhës.

Me kontributin e tij ky personalitet i shquar i kulturës sonë, dha ndihmesa në fusha të ndryshme, si në: përkthimet e veprave nga gjuha shqipe në atë maqedonase dhe anasjelltas, në lëminë e dialektologjisë, të gjuhës së sotme letrare shqipe, sidomos me anë të studimeve, recensioneve, dha një ndihmesë të madhe për kulturën e gjuhës sonë shqipe. Në gjitha punimet, artikujt dhe studimet e Nesimit vërehet profesionalizmi shumë i theksuar, sidomos mënyra si janë trajtuar dhe rezultatet që ka arritur në Maqedoni dhe më gjerë, andaj dhe veprimtaria e tij e frytshme arsimore, shkencore e kulturore u kurorëzua me shumë mirënjohje, diploma e medalje.

Nëse i referohemi Platonit, njeriu ka tri pamje. Një pamje është siç e njeh ai veten, një pamje siç e njohin të tjerët  dhe  pamja e tretë dhe më e vështira për t’u njohur, siç është njeriu në të vërtetë. E profesor Nesimi gjatë gjithë jetës së tij është shfaqur si burrë, njeri me karakter të fortë, figurë e lartë morale në arsim, studiues dhe hulumtues i shkëlqyer, modest e shumë punëtor. Personalitetin e tij në punë e karakterizoi thjeshtësia dhe elokuenca e tij në të folur, njohuritë e thella që kishte jo vetëm në fushën e gjuhësisë, por edhe në atë të problemeve shoqërore të kohës. Erudicioni i tij bazë ishte libri, që nuk u shqit kurrë nga duart e tij.

Kur merr në dorë punën krijuese të profesorit dhe shikon veprimtarinë e tij të dendur, lind natyrshëm pyetja se si u formua sistemi i punës të këtij hulumtuesi të shquar, që dha një rezultat kaq të madh në fusha të ndryshme të krijimeve gjuhësore. Dhe po të shprehemi përmbledhtas, del se në sistemin e punës së tij mësimore edukative, e ruajti me kujdes të madh raportin talent-punë, sepse udhëhiqej nga parimi se çdo gjë varet nga puna që bën njeriu.

Ai më së miri ka ditur të futet në botën e brendshme të studentëve, t’i mbajë ata afër e me dashuri njerëzore të ecin bashkërisht në udhën e vështirë të dijes, duke ndihmuar të kuptojnë të fshehtat e shkencës dhe të jetës, duke zgjuar tek ata energjitë e tyre të brendshme dhe duke i drejtuar në fushat e begata të paqes, mirësisë, dashurisë dhe humanizmit. Shërbeu pa kursyer asgjë nga vetja, duke dhënë nga shpirti i tij i madh e bujar gjithçka për studentët, rrezatoi kulturë dhe me plot pasion për vite me radhë u dha dije e kulturë brezave.

Të gjithë ne që e njohëm ruajmë respekt të veçantë për profesor Remziun jo vetëm si gjuhëtar dhe dijetar, por edhe si njeri i paqes, që me natyrën e tij të qeshur e tejet njerëzore, me idetë dhe njohuritë e thella për probleme të ndryshme, gjithmonë arrinte të na ndihmojë, e me atë të mbetet gjithnjë ndër figurat më të nderuara e ndër më të dashurat të kulturës sonë.

Vepra e profesor Nesimit do të jetojë gjatë, ndërkaq puna dhe entuziazmi i tij do të na shërbejnë si mësim dhe frymëzim i përhershëm në rrugëtimin tonë, tashmë pa të.

Profesor, ju faleminderit për të gjithë atë që bëtë për ne!

I përjetshëm qoftë kujtimi për emrin dhe veprën tuaj!

Leave a Reply

Your email address will not be published.

Të nderuar komentues! Duke mos dashur të cenojmë opinionet tuaja, lutemi që ato të mos përmbajnë gjuhë të urrejtjes, fyerje dhe ofendime personale dhe të jenë në lidhje me shkrimin, apo temën për të cilën komentohet. Në të kundërtën, nuk do të publikohen. Ju falenderojmë që na ndiqni dhe ju ftojmë të vazhdoni të jeni pjesë e Portalb.mk

*

VERZIONI DESKTOP