Aeroplanmbajtësi amerikan arrin në vizitë historike në Vietnam
Një aeroplanmbajtës amerikan ka arritur në Danang, në vizitën e parë të këtij lloji që nga përfundimi i luftës në Vietnam, në vitin 1975.
Transportuesi Carl Vinson, me një ekuipazh prej 6,000 vetash, pritet të kalojë pesë ditë në qytetin port, transmeton REL.
Aktivitetet e tij do të përfshijnë shkëmbime sportive, kulturore dhe profesionale me nikoqirët vjetnamezë.
Vizita ka për qëllim të tregojë forcimin e lidhjeve ushtarake midis dy vendeve, dikur armike.
Por, analistët thonë se vizita, në mënyrë të pashmangshme, dërgon mesazh edhe te Kina, e cila vazhdon të zhvillojë ishujt e kontestueshëm në Detin e Kinës Jugore.
