(E)misioni zuzar i Vaskos dhe moronët shqipfolës

Fatmir Sulejmani

Fatmir Sulejmani

Në shkurt të vitit 2016 shkrova kolumnën “Të jetosh me Vasko”, shkas i së cilës u bë burlesku i egejasit vasko evtov, që, me ndihmën e pseudohistorianëve albanofobë dhe disa mohuesve të origjinës së tyre shqiptare, u përpoq të dëshmojë se rilindësi i Rekës së Epërme Josif Bageri, poeti që krahinën e lindjes e quajti kërthiza e Shqipënisë, paska qenë maqedonas.

Që atëherë vaskoja ka emetuar dhjetra pamflete televizive të konceptuara për dokumentarë, gjithnjë me teh fyes për shqiptarët, të cilët i quan të egër dhe gjenocidistë, i sigurt se për deklaratat skajshmërisht raciste, antishqiptare dhe konfliktnxitëse, nuk ka dhënë kush përgjegjësi në shkretishte, ndaj nuk do të japë as ai.

Javën që shkoi vasko e kishte thirrur në (e)mision Branko Manajllovskin e Kiçinicës së Rekës së Epërme, aktualisht deputet i BDI-së në Kuvendin republikan. Dhe, njësoj si ndaj shqiptarëve të tjerë të ftuar në çervish, nuk e la të flasë fare ose ia ndërpreu të gjitha përgjigjet, duke dërdëllitur marrëzira dhe duke shkelur të gjitha kodekset profesionale e morale të gazetarisë.

Ai keqpërdori poshtërsisht kulturën, edukatën dhe bujarinë e deputetit shqiptar, që prej vitesh jeton në SHBA, duke përsëritur papagallshëm mashtrimet e mirënjohura për të vërtetën e krahinës së Rekës së Epërme, ndaj në fund e meritoi si shpërblim rekomandimin mëshirues dhe human të Xha Brankos që të shkojë të shërojë kryet te psikiatri.

Nuk e zgjas më shumë me skandalozin vasko, me të cilin do të qe mirë të merren intelektualët maqedonas. Por, nuk mund ta mbyll shkrimin pa i thënë dy fjalë për budallenjtë tanë, që, me detyra mashash apo me naivitet moronësh, kllum-en shpesh në shtonën e vaskos dhe të ngjashmive me të, duke linçuar si tradhëtarë gjithë personalitetet shqiptare të cilët i shpall të tillë në (e)misionet thellbësisht kubare vasko.

Publiku i gjerë sigurisht i mban mend rastet kur të ftuarit shqiptarë i kanë braktisur demonstrativisht (e)misionet e egejasit vasko, duke e quajtur të pa cipë dhe të pafytyrë, por, siç e thashë dhe më lart, nuk kanë munguar kurrë as moronët që i kanë gëlltitur si të vërteta shpifjet e gazetarucit, që e ka ngarkuar veten me detyrën e përbaltjes së shqiptarëve të shquar dhe të shtrembërimit të fakteve historike.

Pikërisht këtë e konsideroj të dhemshme, ndaj, për adhuruesit shqipfolës të filoserbit, po shtroj pyetjen e ngjashme me atë që ia bëri para disa ditësh Xha Branko: vërtet beson dikush se vaskoja do të ftonte për ta diskredituar në (e)misionin e tij ndonjë spiun dhe tradhëtar të vërtetë shqiptar?

Nëse ka të tillë, le të shërojnë kryet pa humbur kohë te psikiatri.

Shkrimi është shkruar enkas për Portalb.mk. Të drejtat e publikimit i kanë vetëm ©Portalb.mk dhe autori, sipas marrëveshjes mes tyre.

Leave a Reply

Your email address will not be published.

Të nderuar komentues! Duke mos dashur të cenojmë opinionet tuaja, lutemi që ato të mos përmbajnë gjuhë të urrejtjes, fyerje dhe ofendime personale dhe të jenë në lidhje me shkrimin, apo temën për të cilën komentohet. Në të kundërtën, nuk do të publikohen. Ju falenderojmë që na ndiqni dhe ju ftojmë të vazhdoni të jeni pjesë e Portalb.mk

*

VERZIONI DESKTOP