Kuvendi i Kosovës nuk gjeti zgjidhje për ndotjen e ajrit, seanca vazhdon nesër
Seanca e jashtëzakonshme e Kuvendit të Kosovës e cila po mbahej sot lidhur me gjetjen e ndonjë zgjidhje për evitimin e ndotjes së ajrit do të vazhdojë nesër.
Kuvendi i Kosovës sot nuk arriti të gjejë ndonjë zgjidhje, përkundër se pat propozime të shumta nga ana e grupeve parlamentare.
Në këtë mënyrë, kryesia vendosi që kjo seancë të përfundojë sot, në mënyrë që të vazhdohet nesër.
Niveli i ndotjes së ajrit në Prishtinë ka arritur rekordin javëve të fundit dhe për këtë çështje sot në Prishtinë u mbajt edhe një protestë në shenjë indinjate ndaj institucioneve vendore për neglizhimin e situatës.
Autoritetet qytetare e kanë kufizuar lëvizjen e të gjitha automjeteve në qendrën e qytetit nga ora gjashtë deri në orën 22, ndërsa autobusët janë falas.
Ndërsa nesër autoritetet e qytetit të Prishtinës do të lajnë edhe rrugët në të cilat është ndaluar qarkullimi i automjeteve si masë për uljen e ndotje së ajrit.
Këto masa janë marrë pasi për ditë të tëra në matjet e ndotjes së ajrit, Prishtina është renditur e para si qyteti me ajrin më të ndotur në botë.