Libri skandaloz “Zjarr dhe Furi” që zemëroi Trampin: E quajnë analfabet dhe shumë detaje tjera

Libri i ri “Zjarr dhe Furi” nga Michael Wolff u publikua pavarësisht zemërimit dhe përpjekjeve ligjore nga ana e presidentit amerikan, Donald Trump për ta ndaluar atë. Libri, sipas revistës “Newsweek” ofron një panoramë nga brenda të kandidaturë së Donald Trump për president dhe vitit të parë në detyrë sikundër edhe zbardh me dhjetëra detaje interesante për administratën.

“Zjarr dhe Furi: brenda Shtëpisë së Bardhë të Donald Trump” është hartuar mbi bazën e atyre që Wolff pretendon se janë mbi 200 intervista me presidentin dhe rrethin e tij të ngushtë. Trump, së bashku me një përfaqësues të Zonjës së Parë, Melania Trump sikundër edhe zyrtarë për shtypin në Shtëpinë e Bardhë i kanë cilësuar disa nga dyshimet e ngritura në libër, si të pavërteta.

Më poshtë janë disa nga detajet më eksplozive të paraqitura në libër, zbardhur nga “Newsweek”.

Steve Bannon, ish-kryestrategu i presidentit, e përshkruan një takim midis Donald Trump Jr. dhe një avokati rus me lidhje të forta me Kremlinin, gjatë fushatës së vitit 2016, si “tradhti” dhe “jopatriotike”. “Ata do ta shtypin Don Junior si një vezë në televizionin kombëtar”, citohet të ketë thënë Bannon.

Bannon thuhet se ka deklaruar se presidenti me gjasa ka takuar pjesëmarrësit e këtij takimi, më pas, duke spekuluar se djali i Trump i ka çuar ata në zyrën e të atit. “Mundësia që Don Jr. të mos i ketë shoqëruar këta persona të rëndësishëm në katin e njëzet e gjashtë është zero”, ka thënë Bannon.

Trump nuk dëshironte të fitonte dhe askush në ekipin e tij të fushatës nuk mendonte se ai do të fitonte. “Po, do të ishte një problem nëse ne fitojmë”, kishte garantuar miqtë e vet, ish-këshilltari për sigurinë kombëtare Michael Flynn, kur shpjegoi vendimin për të pranuar 45 mijë dollarë për një fjalim në Rusi.

Vajza e Trump, Ivanka i përshkruante flokët e tij si një stil perfekt inxhinierik që kërkon shumë hapa për t’u realizuar. “Ajo shpesh ua shpjegon mekanikën e stilit të flokëve të të atit miqve të saj.

Trump spekulonte shpesh mbi të metat e stafit të tij pasi mbyllte telefonin me ta. “Bannon ishte jo besnik (për të mos thënë se ai duket gjithnjë shumë keq), Priebus ishte i dobët (për të mos përmendur se është i shkurtër – një xhuxhmaxhuxh),” risjell Wolff reflektimet e Trump. “Kushner është i përulur, Sean Spicer është budalla (dhe po ashtu ka një pamje të tmerrshme). Conway ishte një qaraman, Jared dhe Ivanka nuk duhet të kishin ardhur kurrë në Uashington”.

Ivanka dha bashkëshorti i saj, Jared Kushner kishin rënë dakord që nëse ndonjë prej tyre kandidonte për president në të ardhmen, do të ishte ajo.

Trump ha kaq shpesh tek McDonald’s për shkak të paranojës dhe për shkak se ai është një germafob. “Ka frikë prej një kohe të gjatë se mos e helmojnë, ai do të thoshte se një arsye përse i pëlqen të hajë tek McDonald’s është për shkak se askush nuk e di që ai do të shkojë aty dhe ushqimi është i sigurtë”, thuhet në libër.

Trump kishte një marrëdhënie shumë të ngushtë me Hope Hicks, drejtoren e komunikimit në Shtëpinë e Bardhë. Në rrethet e ngushta të presidentit ajo shihej si vajza e presidentit. “Hope Hicks mendohej në fakt si vajza reale e Trump ndërsa Ivanka mendohej si gruaja e tij reale”, thuhet në libër.

Kur ishte kandidat, Trump nuk kishte aspak interes të mësonte për Kushtetutën, për të cilën dinte shumë pak. “Shkova deri tek Amendamenti i Katërt, përpara se ai të vendoste gishtin tek buza dhe të rrotullonte sytë”, thotë Sam Nunberg, ish-këshilltar i fushatës së Trump.

Trump nuk e shijoi inagurimin. “Ai ishte i zemëruar që yjet e klasit A e kishin trajtuar me mospërfillje ngjarjen, ishte i acaruar me akomodimin, dhe dukshëm i grindur me gruan e tij, e cila dukej sikur do ia plaste të qarit”, pretendon libri.

Trump e kishte garantuar Melaninë se ai nuk do të fitonte zgjedhjet. Në natën e rezultateve kur u bë e qartë se ai do të fitonte, “Melania ishte në lotë – dhe jo në lotë gëzimi”.

Urdhëri i ndalimit të udhëtimit u kaluar një të premte në mënyrë që njerëzit të protestonin në aeroporte.

Trump nuk lexon kurrë. “Ai nuk e proceson informacionin në kuptimin konvencional. Ai nuk lexon. Ai as nuk i shkon afër. Disa besojnë që nga të gjitha kriteret praktike, ai është aspak më shumë sesa një gjysmëanalfabet”, thuhet në libër.

Trump e përmendte në bisedë se kishte shkuar në shtrat me gra të tjera. “Trump i pëlqente të thoshte se një nga gjërat që e bëjnë jetën t’ia vlejë ishte të fusje gratë e shokëve në shtrat”, pretendon libri.

Stili i jetës  së presidentit ndjek shumë rutina të pazakonta. “Nëse ai nuk do të hante darkë me Steve Bannon në orën 6.30, atëherë ai, e këtë e preferonte më shumë, do të ishte në shtrat me një cheeseburger, duke parë tre ekranet e veta dhe duke bërë telefonata.

Trump ndante detaje private për veten me të tjerët e më pas mërzitej kur ato dilnin në publik. “Ndërsa dilnin detaje, ai u bë i fiksuar për të zbuluar se kush i kishte nxjerrë ato. Burimi i gjithë thashethemeve, në fakt, mund të ishte fare mirë vetë Trump”, shkruan Wolff . “Në telefonatat e tij gjatë gjithë ditës, dhe natën në shtrat, ai shpesh fliste me njerëz që nuk kishin arsye për të mbajtur sekretet apo konfidencën me të”.

Përgatiti: Juli Prifti – /tesheshi.com/