Dita e Arsimit Turk, ministrja Deskoska: arsimimi në gjuhën amtare zhvillon pluralizmin në Maqedoni
Në lidhje me 21 Dhjetorin, ditën e arsimit në gjuhën turke në Republikën e Maqedonisë, ministrja e Arsimit dhe Shkencës e Maqedonisë, Renata Deskoska ka dërguar telegram urimi me çka vlerësoi se arsimimi në gjuhën amtare zhvillon pluralizmin kulturor të shtetit, njofton Portalb.mk.
“Mundësia e arsimimit në gjuhën amtare është vlerë themelore e shoqërisë e cila kontribuon në zhvillimin e pluralizmit kulturor në një shtet, sikurse është Republika e Maqedonisë, në të cilën me shekuj jetojnë qytetarët të përkatësive të ndryshme etnike”, thuhet në telegram urimin e Deskoskës.
Më tej në telegram thuhet se e drejta për arsim në gjuhën amtare paraqet edhe mekanizëm për forcim të identiteti kombëtar dhe kulturor, që paraqet përkujdesje ndaj traditave fetare dhe kulturore.
Ky urim i ministres së Arsimit, Renata Deskoska vjen pasi që më 21 dhjetor të vitit 1944, për herë të parë në Republikën e Maqedonisë ka filluar mësimi në gjuhën turke. Që nga atëherë, 21 Dhjetori në Maqedoni quhet dita e arsimit në gjuhën turke.