1 vjet pas zgjedhjeve parlamentare: Protesta, kthesa, gjak dhe dorëheqje

Kanë kaluar 1 vjet nga zgjedhjet parlamentare, duke lënë pas ngjarje të mëdha politike në Maqedoni, ndërkaq si ajo më e madhja padyshim se ngelet hyrja e dhunshme në Kuvendin e Maqedonisë ku brutalisht u rrahën deputetët, njofton Portalb.mk.

Më poshtë në kronologji do t’i përmendim ngjarjet më të rëndësishme në përvjetorin e zgjedhjeve parlamentare.

11 dhjetor 2016 – Janë mbajtur zgjedhjet e nënta parlamentare në Republikën e Maqedonisë, njëkohësisht edhe zgjedhjet e katërta të parakohshme parlamentare. VMRO-DPMNE dhe koalicioni mori 51 deputetë në Kuvend, LSDM dhe koalicioni 49, BDI 10, Lëvizja BESA 5, Aleanca për Shqiptarët 3 dhe PDSH 2 mandate.

15 dhjetor 2016 – Përpara Komisioni Shtetëror të Zgjedhjeve (KSHZ) gjatë vendosjes për ankesat, fillojnë protestat e VMRO-DPMNE-së. Ato janë përsëritur edhe në ditët në vazhdim, gjatë së cilës lideri partiak, Nikolla Gruevski, i sulmoi ambasadorët dhe organizatat joqeveritare se po përzihen në punët e brendshme të Maqedonisë dhe punojnë kundër shtetit.

23 dhjetor 2016 – Kryetari i LSDM-së, Zoran Zaev, i ftoi shqiptarët dhe partitë të mos koalicionojnë me Gruevskin.

7 janar 2017 – Partitë e bllokut shqiptar, BDI, Lëvizja BESA dhe Aleanca për Shqiptarët kumtuan se kanë miratuar platformë të përbashkët, e cila do të jetë baza e tyre për bisedime për pjesëmarrje në qeverinë e re, transmeton Portalb.mk.

9 janar 2017 – Kryetari Ivanov ia ndau mandatin për formimin e Qeverisë, kryetarit të VMRO-DPMNE-së, Nikolla Gruevski.

30 janar 2017 – Lideri i LSDM-së, deklaroi se pret që Ivanov t’ia japë mandatin për formimin e qeverisë së re, pasi që Gruevski në 20 ditët e kaluara nuk arriti që të përbëjë koalicion qeveritar.

1 shkurt 2017 – Ivanov kumtoi se do t’ia ndajë mandatin vetëm partisë ose koalicionit që do t’i dëshmojë se ka siguruar shumicë në Kuvend, gjegjësisht do të dorëzojë nënshkrime nga shumica e deputetëve.

24 shkurt – Fillojnë protestat e iniciativës “Për Maqedoni të Përbashkët” kundër platformës politike të shqiptarëve. Prej atje kërkohet që Ivanov të mos ia japë mandatin Zaevit.

27 shkurt – Zaev publikoi se ka mbledhur 67 nënshkrime dhe pret që Ivanov t’ia japë mandatin.

1 mars 2017 – Ivanov tha se nuk ka për qëllim që t’ia japë mandatin Zaevit, pasi që sipas tij, platforma shqiptare e cenon unitaritetin pavarësinë e shtetit.

Mars dhe prill 2017 – Vazhdon status quo-ja. Ivanov nuk e jep mandatin. Në ndërkohë çdo ditë kanë protestuar përkrahësit e VMRO-DPMNE-së.

27 prill 2017 – Sulm i dhunshëm në Kuvend apo e njohur si “E enjtja e përgjakshme”. Deputetët e VMRO-DPMNE-së me diskutime të gjata kanë bllokuar që të arrihet deri te pika e zgjedhjes së kryetarit të ri të Kuvendit. Pasi që shumica parlamentare e përbërë nga LSDM, BDI, Lëvizja BESA dhe Aleanca për Shqiptarët në sallën kuvendore për kryetar e kanë zgjedhur Ferid Muhiq për kryesues të seancës për zgjedhje të kryetarit të ri të Kuvendit pas mbarimit të seancës së rregullt. Muhiq për zëvendës të tij i ka zgjedhur deputetët Goran Misovski dhe Xhevat Ademi, ndërkaq deputeti i BDI-së, Talat Xhaferi u zgjodh kryetar i Kuvendit. Pas këtij akti, përkrahësit e VMRO-DPMNE-së kanë hyrë në Kuvend pasi që ua kanë hapur dyert nga ana e disa deputetëve dhe kanë filluar që brutalisht t’i rrahin deputetët dhe gazetarët. Disa prej tyre seriozisht janë lënduar. Në mesin e më të lënduarve ishte deputeti Ziadin Sela dhe Zoran Zaev, transmeton Portalb.mk.

30 prill – 1 maj 2017 – Zëvendës/ndihmës sekretar i SHBA-së për Evropë dhe Azi, Hojt Brajan Ji, ka arritur në Shkup për takim dyditor me kryetarin e shtetit, Gjorge Ivanov dhe me krerët e partive politike nga blloku shqiptar dhe maqedonas. Ai e ka dënuar dhunën në Kuvend dhe ka porositur që të zgjidhet kryetar i ri i Kuvendit dhe shumica parlamentare ka përgjegjësi që të formohet qeveria.

17 maj 2017 – Presidenti Ivanov ia dha mandatin Zoran Zaevit për formim të qeverisë.

19 maj 2017 – Bisedimet e para mes Zaevit dhe Ahmetit dhe liderëve tjerë për formimin e qeverisë së re.

31 maj 2017 – Përpara mesnatës, me 62 vota “për” është votuar qeveria e re e udhëhequr nga Zoran Zaev, e cila menjëherë pas saj e bëri betimin.

1 qershor 2017 – Kryetari Ivanov e ka pranuar qeverinë e re.

5 korrik 2017 – Kryeministri Zoran Zaev e ka prezantuar “Planin 3-6-9”.

6 gusht 2017 – Kuvendi e votoi rebalancin e buxhetit për vitin 2017.

17 gusht 2017 – Kuvendi e shkarkoi prokurorin shtetëror Marko Zvërlevski.

15 tetor 2017 – Rrethi i parë i zgjedhjeve lokale.

29 tetor 2017 – Rrethi i dytë i zgjedhjeve lokale.

27 nëntor 2017 – arrestohet ish ministri i Punëve të Brendshme dhe ish drejtori i Byrosë për Siguri Publike (BSP), Mitko Çavkov, organizatorët e protestave “Për Maqedoni të përbashkët” dhe gjashtë deputetë, për shkak të dhunës në Kuvendin e Maqedonisë. Prokuroria për Krim të Organizuar dhe Korrupsion kumtoi se kundër tyre, gjegjësisht kundër 36 personave ka hapur hetim dhe i ngarkon për rrezikim terrorist të rendit dhe sigurisë kushtetuese të shtetit.

10 dhjetor 2017 – Nikolla Gruevski dha dorëheqje të parevokueshme nga pozita e kryetarit të VMRO-DPMNE-së.