Abadi ka shpallur fundin e luftës kundër SHI-së në Irak
Kryeministri irakian Hajder al Abadi sot ka shpallur fundin e luftës që forcat qeveritare dhe aleatët e tyre e zhvilluan tre vitet e fundit në Irak kundër grupit xhihadist Shteti Islamik (SHI).
“Forcat tona kanë kontroll të plotë ndaj kufirit irakianо-sirian dhe për këtë shkak shpall fundin e luftës kundër SHI-së”, deklaroi Abadi në fjalimin në konferencën e organizuar nga Sindikata e Gazetarëve irakianë.
Ai ka theksuar se armiku ka dashur ta shkatërrojë civilizimin irakian, por se ndërkaq nuk е ka arritur këtë qëllim.
“Ne fituam falë unitetit dhe vendosmërisë tonë. I fituam për një kohë të shkurtër”, tha Abadi.
Në vitin 2014 luftëtarët e SHI-së e morën kontrollin mbi një të tretën e territorit të Irakut dhe u afruan pothuajse deri në paralagjen e Bagdadit, me çfarë e sollën në pikëpyetje ekzistimin e shtetit.
Në tetor të vitit 2016 armata irakiane së bashku me formacionet paraushtarake shiite, forcat e kurdëve irakianë dhe luftëtarët fisnorë sunitë lokalë, me mbështetjen e koalicionit antixhihadist ndërkombëtar, filluan ofensivë kundër SHI-së, me të cilën deri në mes të verës i dëbuan xhihadistët nga pothuajse të gjitha vendbanimet në vend.
