Albin Kurti në burg për 28 Nëntor

F. C. 20:37, 27-11-2017

Nesër bëhet dy vite kur njësitet speciale të Policisë së Kosovës kishin thyer selinë e Vetëvendosjes për të arrestuar deputetin dhe themeluesin e saj, Albin Kurti. Atë ditë Kurti ishte arrestuar në mënyrë të dhunshme, pas një rezistence të gjatë të mbështetësve të tij në VV kundër Policisë. Po sikur 28 Nëntorin e 2015-ës, edhe këtë 28 Nëntor, duket se Kurti do ta kalojë në burg.

Kurti ishte arrestuar një orë pasi kishte folur në tubimin e opozitës, që ishte thirrur në shenjë kundërshtimi ndaj marrëveshjes për ngritjen e Asociacionit të komunave të banuara me shumicë serbe dhe marrëveshjes për demarkacionin e kufirit me Malin e Zi. Vlen të theksohet se disa organizata vendore e ndërkombëtare, veprimin e Policisë e kishin vlerësuar si dhunë të panevojshme që kishte tejkaluar kompetencat e zyrtarëve policor.

Ndaj Kurtit ishte lëshuar një urdhër arresti për shkak të veprimeve gjatë protestave të opozitës në parlamentin e Kosovës, kundër marrëveshjeve me Serbinë.

Veç tij, policia kishte shoqëruar edhe 87 aktivistë të Vetëvendosjes, të cilët ndodheshin në selinë e VV-së në momentin e bastisjes nga forcat speciale, shkruan Periskopi.

Megjithatë, Policia e Kosovës është mobilizuar sërish për ta arrestuar Kurtin edhe këtë nëntor dhe me gjasë, edhe këtë festë ai do ta kalojë në burg, konkretisht në paraburgim.

Të shtunën e kaluar (25 nëntor), Kurti u arrestua para Kuvendit të Kosovës, bashkë me deputeten Albulena Haxhiu e Donika Kadaj-Bujupi, por që të treve iu caktua masa e arrestit shtëpiak, vetëm një ditë pasi që u ishte caktuar masa e paraburgimit prej 30 ditësh.