Trajnim për fëmijët me nevoja speciale në Komunën e Gostivarit

Si të arrihen rezultate më të mira në trajtimin e fëmijëve me autizëm, ishte qëllimi i trajnimit të sotëm të mbajtur në sallën e Këshillit të Komunës së Gostivarit, ku të pranishëm ishin defektologë, logopedë, mësimdhënës, edukatore, punonjës socialë dhe prindër të fëmijëve me autizëm.

Tarjnimin, njoftojnë nga Zyra për informim e Komunës, e realizuan profesionistë nga Qendra e autizimit “Fluturo për jetën” nga Elbasani, në bashkëpunim me Qendrën e personave me aftësi të kufizuar “Porosia” nga Dibra, me mbështetje logjistike të Komunës së Gostivarit, transmeton MIA. 

Ligjërues në këtë trajnim ishin logopedi Gjergji Doka, punonjësi social Xhafior Cankja dhe fizioterapisti Erald Pasa, ndërsa në fund të trajnimit u prezantua një video-material me histori suksesi.

Fjalë përshëndetëse mbajti edhe kryetari i komunës së Gostivarit, Arben Taravari,  i cili tha se autizmi si nocion dikur, edhe pse i pranishëm, ka qenë më pak i njohur në trevat tona, ndërsa tani fatkeqësisht ka marrë përmasa më të mëdha dhe kërkon një trajtim adekuat.

“Në këtë drejtim është edhe ky trajnim i sotëm, i cili shpresoj se do tu ndihmojë edhe profesionistëve edhe prindërve të cilët kanë fëmijë me autizëm. Falënderoj përfaqësuesit e shoqatave nga Elbasani dhe nga Dibra, për realizimin e këtij trajnimi dhe shpresoj se trajnime dhe aktivitete të ngjashme do të organizoni edhe në të ardhmen, ndërsa administrata komunale do të jetë gjithmonë në dispozicion për të ofruar asistencën dhe logjistikën e nevojshme”, tha Taravari.

Krahas pjesës formale të trajnimit, të pranishmit këmbyen përvojat e tyre në trajtimin e fëmijëve me autizëm, ndërsa prindërit patën mundësi që individualisht të konsultohen me ligjëruesit