Rusia pretendon se SHBA-të mbrojnë DEASH-in

Ministria e Mbrojtjes e Rusisë ka pohuar se kanë siguruar fakte që koalicioni i kryesuar nga Shtetet e Bashkuara të Amerikës (SHBA) mbron organizatën terroriste DEASH, duke shtuar se SHBA-të kanë refuzuar të ndërmarrin sulm ajror ndaj militantëve të DEASH-it të tërhequr nga rrethina e qytetit Ebu Kemal edhe përkundër të gjitha paralajmërimeve nga Rusia, transmeton Anadolu Agency (AA).

Në një deklaratë me shkrim nga ministria thuhet se është konfirmuar se autokolona e DEASH-it e gjatë disa kilometra ka avancuar në drejtim të Luginës Sabha në kufi me Irakun nga qyteti Ebu Kemal në prefekturën e Dejrizorit në Siri më 9 nëntor.

Sipas deklaratës, Rusia i është drejtuar koalicionit të kryesuar nga SHBA-të për të ndërmarrë operacion ushtarak ndaj autokolonës në fjalë.

“Në një mënyrë absolute, amerikanët refuzuan të ndërmarrin çfarëdo operacioni ushtarak me arsyetimin se militantët e DEASH-it janë duke u dorëzuar vullnetarisht”, thuhet në deklaratë.

Ndërkaq, në deklaratën e ministrisë thuhet se janë përdorur edhe pamje të pretenduara satelitore të autokolonës së DEASH-it, të cilat më pas, siç thuhet, janë fshirë. Ministria theksoi se pamjet paraprake ishin “të gabuara”, duke shtuar pamje të reja për të cilat u pohua se i përkasin autokolonës së DEASH-it.

Nga ana tjetër, Ministri i Jashtëm i Rusisë, Sergey Lavrov, në një deklaratë për mediumet në Moskë tha se nuk është hera e parë që SHBA-të kanë mbrojtur terroristët e DEASH-it.

“Edhe më parë, gjatë marrjes së kontrollit të Rakkas dhe Mosulit, e kemi parë se s’i kanë hapur rrugën për ikjen e pjesëtarëve të DEASH-it. Sekretari Amerikan i Shtetit, Rex Tillerson, më ka thënë disa herë se qëllimi kryesor i tyre është shkatërrimi i DEASH-it në Siri, megjithatë, ekzistojnë shumë pikëpyetje lidhur me qëllimet e SHBA-ve në Siri”, është shprehur Lavrov.

Leave a Reply

Your email address will not be published.

*

Të nderuar komentues! Duke mos dashur të cenojmë opinionet tuaja, lutemi që ato të mos përmbajnë gjuhë të urrejtjes, fyerje dhe ofendime personale dhe të jenë në lidhje me shkrimin, apo temën për të cilën komentohet. Në të kundërtën, nuk do të publikohen. Ju falenderojmë që na ndiqni dhe ju ftojmë të vazhdoni të jeni pjesë e Portalb.mk

VERZIONI DESKTOP