Inzaghi mohon interesin për Balotellin: Tare e Lotito, s’më kanë thënë gjë

Në prag të ndeshjes së Europa League-s, ndaj Nices, trajneri i Lazios ka folur për momentin e mirë që po kalon skuadra. Inzaghi u shpreh i kënaqur me futbollistët që ka në dispozicion, teksa vlerësoi edhe angazhimin e tyre maksimal për të bërë sa më mirë, njofton Supersport.al.

“Stërvit një grup të mirë, që punonjnë me përkushtim dhe kanë dëshirë të ecin përpara. Jam i kënaqur me angazhimin e të gjithë futbollistëve, edhe atyre që kanë luajtur pak, por që qendrojnë gjithmonë të gatshëm për ekipin”, tha trajneri lacial.

Inzaghi nuk zbuloi asgjë sa i përket formacionit me të cilin do të përballojë francezët, teksa theksoi se në fushë do të zbresin ata që janë në formë më të mirë. Tekniku i Lazios hodhi dritë edhe mbi fjalët për një interesim të bardhekaltërve, për të afruar sulmuesin italian të Nices, Mario Balotelli.

“Balotelli është një sulmues i madh, që kur është në formë mund t’i bëjë keq çdo kundërshtari, por e vërteta është që deri më tani, as Tare dhe as Lotito nuk më kanë folur për mundësinë e afrimit të tij në ekipin tonë”, u shpreh Inzaghi.

Nice dhe Lazio kryesojnë grupin G, me nga 6 pikë të plota dhe do të përballen nesër në orën 19:00, ndërsa takimi do të transmetohet në Supersport 3.