LIBRI MBI MILUTININ

Salajdin Salihu

Salajdin Salihu

Në Serbinë e vitit 1985 kudo flitej për romanin e Danko Popoviqit, “Libri mbi Milutinin”, i ribotuar 18 herë, në qindra mijëra kopje.

Është një libër mediokër që e shumëfishon mesazhin e njohur të elitës nacionaliste: “Serbët i flijojnë interesat e tyre për shkakun e të tjerëve”.

Është një pamflet ideologjik që, sikurse thuhet, e përmban esencën e ideve të famëkeqit Dobrica Qosiq.

Është një libër që u bë armë e fuqishme në arsenalin vdekjeprurës të nacionalizmit serb, sepse aty serbët paraqiten si viktimë.

Ndjenja e viktimës tek serbët është ngritur në mit. Kjo ndjenjë shkakton humbjen e kontakteve me realitetin. Njeriu që jeton me mitin bëhet objekt manipulimi nga një regjim i caktuar.

Serbia vazhdon të dominohet nga arroganca kombëtare dhe ideja e heroizimit të së kaluarës. Ajo dominohet nga ideja e dominimit në rajon. Ajo dominohet nga ideja e kombit – viktimë që ka të drejtën e çdo privilegji moral e politik dhe çdo veprim i egër duhet t’i falet paraprakisht, përkundër gjithë tmerreve që i ka shkaktuar.

Romani “Libri mbi Milutinin” e forcon mitin mbi armiqtë kundër të cilëve duhet të ndodh hakmarrja. Personazhi i romanit thotë: “Duhet të kthehemi t’i vrasim arnautët”. Paraprakisht autori flet kinse për dhunën e shqiptarëve ndaj serbëve. Një retorikë e përdorur nga politika e egër, që kështu e përligjte krimin.

Kjo ndjenjë e hakmarrjes është shfaqur dhe do të shfaqet sërish për sa kohë Serbia udhëhiqet nga ideologjia që solli vetëm rrënim moral.

Në Serbi asnjëherë nuk kanë triumfuar idetë e intelektualëve të tipit të Danilo Kishit, i cili e quante nacionalizmin si “ideologji e kiçit dhe e banalitetit”. Dihen sulmet kundër tij.

As të shkrimtarit Nikolla Kovaç, i cili thoshte se “nacionalizmi keqpërdoret nga shkrimtarët impotentë”. Dihet se si që dhunuar, kërcënuar dhe detyruar të shpërngulej para se ta likuidonin.

As idetë e shkrimtarit Filip David, sipas të cilit disa shkrimtarë serbë “duhej që të ishin në Hagë”. Dihet se si qe akuzuar për tradhti nga nacionalistët serbë, të cilëve ua ktheu: “Të qenit tradhtar në këtë vend dhe në këtë sistem është më e pakta që mund të bëjë njeriu i moralshëm dhe i ndershëm”.

Në Serbi përherë kanë triumfuar idetë e Qosiqit, Beçkoviqit, Nogos, Kusturicës, Popoviqit etj.

Serbia e sotme, sado tenton të paraqitet me tjetër imazh, në thelb është e njëjta. Ajo nuk ka ndryshuar. Edhe politikanët janë po ata. Të dikurshmit. Ajo, mjerisht, nuk mund të çlirohet nga filozofia e provincës.

Shkrimi është shkruar enkas për Portalb.mk. Të drejtat e publikimit i kanë vetëm ©Portalb.mk dhe autori, sipas marrëveshjes mes tyre.

Leave a Reply

Your email address will not be published.

*

Të nderuar komentues! Duke mos dashur të cenojmë opinionet tuaja, lutemi që ato të mos përmbajnë gjuhë të urrejtjes, fyerje dhe ofendime personale dhe të jenë në lidhje me shkrimin, apo temën për të cilën komentohet. Në të kundërtën, nuk do të publikohen. Ju falenderojmë që na ndiqni dhe ju ftojmë të vazhdoni të jeni pjesë e Portalb.mk

VERZIONI DESKTOP