NA KANË MJELË SI LOPË

Fatmir Sulejmani

Fatmir Sulejmani

Klithmat histerike për qërrimin e hesapeve me shqiptarët, për futjen e tyre në birë të miut dhe dominimin e përjetshëm mbi ta nuk janë të reja. Ata që kanë lënë do vite pas vetes i kanë të freskëta edhe bulërimat e para 20 viteve, e para 27 viteve, e kohës kur shqiptarët e shkretishtes ishin poligoni ku testohej durimi ynë për nevojat e hegjemonizmit serb. Si atëherë, si sot, shovinizmi i përkëdhelur i komshisë përmblidhet brenda platformës konstante albanofobe, sipas së cilës: Është irelevant përfaqësimi i bashkësive me 5, 20 ose 50 përqind. E rëndësishme është që mos ta lejojmë shndërrimin e Maqedonisë në shtet binacional, ashtu si duan shqiptarët përmes legalizimit të përdorimit të gjuhës dhe flamurit të tyre…

Kjo e shpjegon mirëfilli mllefin e kapardisur të së sotmes, që përplaset sallamadishëm mbi kurrizin e shqiptarëve – të vetmes etni që me zemërgjerësi të pakuptueshme i pranon bashkëvendasit, mu si u shtanget atyre: si gjuhë, si fe, si komb, si shtet.

Vakia e Zotit! Gjithë ky helm i derdhur kundër Gjuhës shqipe, që është folur këtyre hapësirave që nga kohët që nuk mbahen mend, përfshirë këtu edhe vitet e sistemit të egër totalitar që, ashiqare, po i bën shkëpurdhjet e mbrame pikërisht në vendin e çudirave.

Kush u ka faj komshive për vonesat historike, për papërjetueshmërinë me vetveten, për katandisjen e përjetshme n’qullnaja identitetesh? Ne nuk kemi marrë pjesë në zhvatjen e hises së tyre. Përkundrazi: na kanë mjelë si lopë t’xhalla t’Perëndisë dhe mbi kurriz tonin kanë ndërsyer cunamët e albanofobisë, kanë shëruar komplekset e ulëta dhe vesveset patologjike, sepse dashamirësinë tonë e kanë llogaritur një dajm si sakatllëk të lindur, që u jep kurajo t’na i fusin të dy këmbët në një çizme të vetme.

Si të kuptohen ndryshe kërcënimet e hapura për disipolinimin, dëbimin dhe shfarrosjen e shqiptarëve? Prej nga gjithë kjo urrejtje e popullit që në lëkurën e vet përjeton turpërime të vazhdueshme që lidhen me gjuhën, kombin, kishën, shtetin, simbolet shtetërore? Përse nuk kanalizohet urrejtja drejt mohuesve tradicionalë të tyre: grekërve, serbëve, bullgarëve…? Mos është në pyetje kompenzimi i fyerjeve me derdhje të pakontrolluara mllefesh ndaj atyre që aktualisht konceptohen për më të dobët e më budallenj? Në qoftë kështu, nuk e di a e meriton kush kosmopolitizmin naiv shqiptar, të manifestuar pa taktin dhe kodet e kuptueshme ballkanike.

Më e çutishmja është se, aktualisht, edhe përkundër insistimit të diplomacisë evropiane dhe amerikane për qetësimin e gjakrave, po shtohen legenët që trumbetojnë se në shtetin sovran, i cili paskësh qenë vetëm i tyre, nuk mund të përdoret e barabartë Gjuha shqipe, por nuk bëzanë njeri për eshtrat shqiptare të mbetura fushëbetejave të Sremit dhe kurvërive të tivareve e namenishaneve; nuk flet kush për ëndrrat e mbytura në gjak për një të ardhme plotësisht të lirë mes etnive të lira të botës; nuk shpalos kush plagët e sëpatave të rëna mespërmes mishit, ashtit dhe shpirtit shqiptar. Prandaj: mos të kujtojë dikush se heqja dorë prej deklaratës së nënshkruar nga subjektet politike shqiptare, ashtu siç pretendojnë ca ekspertë gjithollogë, do ta ndryshojë situatën. Një akt i tillë do ta legalizonte mirëfilli nëpërkëmbjen e mëtejme dhe do ta zgjonte oreksin donkishotesk të tjetrit për asimilimin tonë dhe braktisjen e tërësishme të vatrave stërgjyshore.

Shkrimi është shkruar enkas për Portalb.mk. Të drejtat e publikimit i kanë vetëm ©Portalb.mk dhe autori, sipas marrëveshjes mes tyre

Leave a Reply

Your email address will not be published.

*

Të nderuar komentues! Duke mos dashur të cenojmë opinionet tuaja, lutemi që ato të mos përmbajnë gjuhë të urrejtjes, fyerje dhe ofendime personale dhe të jenë në lidhje me shkrimin, apo temën për të cilën komentohet. Në të kundërtën, nuk do të publikohen. Ju falenderojmë që na ndiqni dhe ju ftojmë të vazhdoni të jeni pjesë e Portalb.mk

VERZIONI MOBIL